لاہور: وزیر اعلیٰ پنجاب عثمان بزدار سے اسپیکر پنجاب اسمبلی پرویز الٰہی کی ملاقات ہوئی، ملاقات میں دونوں نے اتفاق کیا کہ رکاوٹوں اور سازشوں کا ڈٹ کر مقابلہ کریں گے۔
تفصیلات کے مطابق وزیر اعلیٰ پنجاب عثمان بزدار سے اسپیکر پنجاب اسمبلی پرویز الٰہی کی ملاقات ہوئی، ملاقات میں باہمی دلچسپی کے امور، سیاسی صورتحال اور ترقیاتی منصوبوں پر تبادلہ خیال کیا گیا۔
وزیر اعلیٰ نے اسمبلی کی کارروائی بطریق احسن چلانے پر اسپیکر پرویز الٰہی کو خراج تحسین پیش کیا۔ دونوں نے ملاقات میں اتفاق کیا کہ رکاوٹوں اور سازشوں کا ڈٹ کر مقابلہ کریں گے۔
پرویز الٰہی کا کہنا تھا کہ عثمان بزدار کے ساتھ کھڑے تھے، کھڑے ہیں اور کھڑے رہیں گے۔ تحریک انصاف کے اتحادی ہیں اور ہمارا اتحاد پہلے سے زیادہ مضبوط ہے۔
اسپیکر صوبائی اسمبلی کا کہنا تھا کہ اتحاد میں دراڑ ڈالنے کی خواہش رکھنے والوں کے ارمان پورے نہیں ہوں گے۔
وزیر اعلیٰ نے کہا کہ نئے سال میں بھی اتحادیوں کو ساتھ لے کر چلیں گے۔ اپوزیشن کے پاس ایجنڈا نہیں، صرف نان ایشوز پر سیاست کی جا رہی ہے۔
انہوں نے مزید کہا کہ پنجاب حکومت نے مختصر عرصے میں ریکارڈ قانون سازی کی۔ پنجاب اسمبلی کا قانون سازی کا ریکارڈ دیگر صوبوں میں سب سے بہتر ہے۔
