لاہور: وزیر اعلیٰ پنجاب عثمان بزدار کا کہنا ہے کہ مسلم لیگ ن نے سیکیورٹی کے نام پر 55 کروڑ روپے جاتی امرا پر خرچ کیے، اتفاق فاؤنڈری سے 240 کنال اراضی وا گزار کروائی گئی۔ اس میں سے 71 کنال اراضی وفاقی حکومت کی تھی۔
تفصیلات کے مطابق وزیر اعلیٰ پنجاب عثمان بزدار نے حکومت کی 100 روزہ کارکردگی پر بریفنگ دیتے ہوئے کہا کہ تجاوزات کے خلاف بھرپور آپریشن کیا گیا، سرکاری زمینوں پر تجاوزات سے متعلق تحقیقات جاری ہیں۔
وزیر اعلیٰ نے کہا کہ لاہور سمیت پنجاب بھر میں لاکھوں ایکڑ اراضی واگزار کروائی۔ اتفاق فاؤنڈری سے 240 کنال اراضی وا گزار کروائی گئی۔ اس میں سے 71 کنال اراضی وفاقی حکومت کی تھی۔ کوشش کی ہے انسداد تجاوزات آپریشن میں عام آدمی متاثر نہ ہو۔
انہوں نے کہا کہ ہم اپنی ایک ایک پائی کا حساب دیں گے۔ سابق وزیر اعلیٰ کے پاس 2 ہزار سے زائد، ہمارے پاس صرف 60 سیکیورٹی اہلکار ہیں۔ سرکاری زمینوں پر قبضے میں اداروں کے افسران شامل تھے۔
وزیر اعلیٰ کا کہنا تھا کہ غیر قانونی ہاؤسنگ سوسائٹیز کا بھی پتہ چلایا گیا۔ ہفتے میں ایک دن عام آدمی کے مسائل کے حل کے لیے مختص کیا ہوا ہے۔ میرے دروازے عام آدمی کے لیے کھلے ہوئے ہیں۔
عثمان بزدار نے بتایا کہ مسلم لیگ ن نے سیکیورٹی کے نام پر 55 کروڑ روپے جاتی امرا پر خرچ کیے، جس نے بھی سرکار کا پیسہ کھایا اسے واپس کرنا پڑے گا۔ جہاں جس اقدام کی ضرورت ہوئی ہم کریں گے۔
