لاہور : وزیراعلیٰ پنجاب سردار عثمان بزدار کا کہنا ہے کہ پنجاب میں کورونا کی روزانہ ٹیسٹنگ استعداد کار5ہزار ہوچکی ہے، جلد روزانہ 10ہزار ٹیسٹ کی صلاحیت حاصل کر لے گا۔
تفصیلات کے مطابق وزیراعلیٰ پنجاب سردار عثمان بزدار نے پنجاب کےاراکین قومی اسمبلی کے نام خط لکھا ، جس میں عثمان بزدار نے کہا کہ کورونا وائرس کی وجہ سےوطن عزیزکوغیرمعمولی حالات کاسامناہے، پنجاب حکومت نے روک تھام کیلئے ہر سطح پر مؤثر اقدامات کیےہیں۔
خط میں وزیراعلیٰ پنجاب کا کہنا تھا کہ حکومتی اقدامات کی مانیٹرنگ میں اراکین قومی اسمبلی کاکرداراہم ہے، امید ہےاراکین اپنی تمام کوششیں کورونا سے نمٹنے کیلئے بروئےکارلائیں گے، مشترکہ کاوشوں اوراجتماعی حکمت عملی سےمرض پرقابوپانےمیں مدد ملے گی۔
عثمان بزدار نے کہا کہ پنجاب میں کوروناکی روزانہ ٹیسٹنگ استعدادکار5ہزارہوچکی ہے، جلدروز10ہزارٹیسٹ کی صلاحیت حاصل کرلےگا، قرنطینہ،فیلڈ اسپتال،آئسولیشن وارڈزاورایچ ڈی یوقائم کیےہیں۔
خط میں کہا گیا کہ کورونا کےباعث بےروزگارافرادکی پریشانیوں کاادراک ہے،وزیراعظم کی قیادت میں مالی امدادکاسب سےبڑاپروگرام شروع کیا ہے اور رمضان میں ذخیرہ اندوزی اورگراں فروشی سےعوام کومشکلات ہیں، اراکین کی قومی ذمے داری ہے کہ اپنے اضلاع میں انتظامیہ سےرابطہ رکھیں۔
وزیراعلیٰ پنجاب نے مزید کہا کہ عوامی نمائندےذخیرہ اندوزوں کےخلاف کارروائی کی مانیٹرنگ کریں، انسداد ڈینگی اورکلین اینڈ گرین پنجاب کےلیےاقدامات کی نگرانی کریں، اسپتالوں کادورہ کر کے علاج معالجہ کی سہولتوں کابھی جائزہ لیں، مشکلات کےتدارک اورمسائل کےحل میں بھرپور کرداراداکریں۔
خط میں عثمان بزدار کا کہنا تھا کہ مشکل وقت جلدگزرجائےگا، دکھ درد بانٹنے اور ضروریات پورا کرنے والوں کو تادیر یاد رکھا جائے گا۔
