لاہور: وزیراعلیٰ پنجاب عثمان بزدار کا کہنا ہے کہ قائد اعظم سے منسوب ہر یادگار پاکستانیوں کو جان سے پیاری ہے۔
اے آروائی نیوز کی رپورٹ کے مطابق وزیراعلیٰ پنجاب عثمان بزدار نے زیارت میں قائد اعظم ریزیڈنسی کا دورہ کیا، عثمان بزدار نے قائد اعظم ریزیڈنسی کے مختلف حصے دیکھے اور بانی پاکستان کے زیر استعمال اشیا میں گہری دلچسپی کا اظہار کیا۔
وزیراعلیٰ پنجاب نے قائد اعظم ریزیڈنسی کی شاندار انداز میں تعمیر و بحالی پر مسرت کا اظہار کیا اور حکومت پنجاب کی جانب سے قائد اعظم ریزیڈنسی کے لیے تعاون کی پیش کش کی۔
وزیراعلیٰ پنجاب @UsmanAKBuzdar کا زیارت میں بانی پاکستان قائداعظم محمد علی جناحؒ کی ریزیڈنسی کا دورہ: وزیراعلیٰ عثمان بزدار نے قائداعظم ریزیڈنسی کے مختلف حصے دیکھے۔
▪︎وزیراعلیٰ کا قائد اعظم ریزیڈنسی میں بانی پاکستان کے زیر استعمال اشیاء میں گہری دلچسپی کا اظہار۔ pic.twitter.com/0SvULnOlBb— Government of Punjab (@GOPunjabPK) July 15, 2020
عثمان بزدار نے کہا کہ قائد اعظم ریزیڈنسی پاکستان کا اثاثہ ہے، دل و جان سے حفاظت کریں گے، قائد اعظم محمد علی جناح کا احسان ہم تاقیامت نہیں اتار سکتے۔
انہوں نے کہا کہ ایسے عظیم رہنما صدیوں میں پیدا ہوتے ہیں، قائد اعظم سے منسوب ہر یادگار پاکستانیوں کو جان سے پیاری ہے۔
زیارت میں وزیراعلیٰ پنجاب عثمان بزدار سے بلوچ عمائدین نے ملاقات کی، وزیر اعلیٰ کو بلوچ قبائلیوں نے روایتی انداز میں خوش آمدید کہا، ملاقات میں باہمی دلچسپی کے امور اور ملکی صورتحال پر تبادلہ خیال کیا گیا۔
