دنیا بھر کے بلے بازوں کو اپنی گھومتی گیندوں سے چکرانے والے گگلی ماسٹر عبدالقادر کے بیٹے مستقبل سے مایوس ہوکر آسٹریلیا چلے گئے
پاکستان کے نوجوان اسپنر اور سابق لیگ اسپنر عبدالقادر مرحوم کے صاحبزادے عثمان قادر پاکستان میں کرکٹ سے مایوس ہو کر کینگروز کے دیس چلے گئے ہیں اور وہاں لیگ کرکٹ کھیل رہے ہیں۔
عثمان قادر جو کچھ عرصہ قبل آسٹریلیا گئے تھے۔ ذرائع نے بتایا ہے کہ وہ اپنے مستقبل کے لیے آسٹریلیا کو ہی اپنا مستقل گھر بنانا چاہتے ہیں اور جلد ہی ان کی فیملی بھی وہاں چلی جائے گی۔
نوجوان اسپنر اس وقت نیو ساؤتھ ویلز میں مقیم ہیں اور سڈنی میں ہاکسبری کلب کی جانب سے کھیل رہے ہیں۔
عثمان قادر جو پہلے بھی پاکستان کرکٹ ٹیم میں مواقع نہ ملنے پر آسٹریلیا چلے گئے تھے۔ وہ اپنے مرحوم والد کی خواہش پر پاکستان واپس آئے تھے کیونکہ عبدالقادر اپنے بیٹے عثمان قادر کو پاکستان کی جانب سے کھیلتا دیکھنا چاہتے تھے۔
انہوں نے ایک ون ڈے اور 25 ٹی ٹوئنٹی انٹرنیشنل میچز میں پاکستان کی نمائندگی کی، تاہم مناسب مواقع نہ ملنے اور مسلسل نظر انداز کیے جانے کے باعث انہوں نے مایوس ہوکر گزشتہ برس اکتوبر میں پاکستان کرکٹ سے ریٹائرمنٹ لے لی تھی۔
عثمان قادر نے ساؤتھ آسٹریلیا کی نمائندگی کرنے کے ساتھ پرتھ اور ایڈیلیڈ کی جانب سے بگ بیش لیگ بھی کھیل چکے ہیں۔ جب کہ وہ آسٹریلیا کی پرائم منسٹر الیون کی جانب سے بھی کھیلنے کا اعزاز بھی رکھتے ہیں۔
ان کا کہنا ہے کرکٹ ہی میرا روزگار ہے، مستقبل کے پلان کے ساتھ آسٹریلیا آیا ہوں، پُرامید اور پُرعزم ہوں کہ یہاں کرکٹ میں ہی مجھے اچھے مواقع ملیں گے۔
