ابو ظہبی: متحدہ عرب امارات میں 95 فیصد سے زائد آبادی کرونا وائرس سے بچاؤ کے لیے مکمل طور پر ویکسی نیٹ ہوچکی ہے، کرونا وائرس کے کیسز میں کمی کا سلسلہ جاری ہے۔
متحدہ عرب امارات کے حکام کا کہنا ہے کہ کرونا ویکسین کی دونوں خوراکیں لینے والوں کی شرح 95.21 فیصد ہوگئی ہے۔
شعبہ صحت کی ترجمان ڈاکٹر فریدہ الحوسنی نے کہا کہ حکومت صحت، نگہداشت اور علاج کی سہولتیں بڑھا کر شعبہ صحت کی صلاحیت مضبوط سے مضبوط تر کررہی ہے اور وبا کے انسداد کے لیے ضروری اقدامات کیے جارہے ہیں۔
ڈاکٹر الحوسنی نے بتایا کہ امارات میں پہلی خوراک لینے والوں کا تناسب 100 فیصد تک پہنچ چکا ہے جبکہ دو خوراک لینے والوں کا تناسب 95.21 فیصد ہے۔
خیال رہے کہ متحدہ عرب امارات میں کرونا کے نئے کیسز مسلسل کم ہو رہے ہیں، بدھ 16 فروری کو کرونا وائرس کے 3 لاکھ 65 ہزار 306 ٹیسٹ کیے گئے جن میں سے 957 مثبت نکلے۔
نئے کیسز کے کووڈ متاثرین کی کل تعداد 8 لاکھ 71 ہزار 315 تک پہنچ گئی ہے۔ کووڈ 19 سے صحت یاب ہونے والوں کی تعداد 8 لاکھ 8 ہزار 824 ہوچکی ہے۔
امارات میں کرونا وائرس سے اب تک 2 ہزار 289 افراد کی اموات ہوچکی ہے۔
