The news is by your side.

ورون دھون کا ابرار الحق کے لیے پیغام وائرل

بالی ووڈ کے معروف اداکار ورون دھون کا گلوکار ابرار الحق کے لیے دیا گیا پیغام سوشل میڈیا پر وائرل ہوگیا۔

بھارتی اداکار ورون دھون نے فلم ’جگ جگ جیو‘ میں ابرار الحق کا گانا شامل کرنے پر ان کا شکریہ ادا کیا اور ان کی تعریف بھی کی۔

ایک انٹرویو میں ورون دھون نے کہا کہ ’میں ابرار جی کو یہی کہنا چاہوں گا کہ انہوں نے اورینجل گانا بہت بہترین گایا، ہمیں بہت اچھا لگا جو ہماری میوزک کمپنی ہے اس نے گانے کے حقوق خریدے اور اب یہ گانا کافی اچھا چل رہا ہے ، شکریہ ابرار۔‘

خیال رہے کہ گزشتہ دنوں بالی وڈ کے معروف ہدایتکار کے پروڈکشن ہاؤس ’دھرما‘ نے اپنے سوشل میڈیا اکاؤنٹ پر فلم، ’جگ جگ جیو‘ کا ٹریلر ریلیز کیا جس میں ابرارالحق کا 2002 میں ریلیز ہونے والا مشہور گانا ’نچ پنجابن‘ کو تھوڑا تبدیل کرکے استعمال کیا گیا۔

بعد ازاں پاکستانی گلوکار ابرار الحق نے بالی وڈ کے مشہور ہدایتکار کرن جوہر اور ان کے پروڈکشن ہاؤس پر اجازت کے بغیر گانا ‘نچ پنجابن’ اپنی فلم میں استعمال کرنے کا الزام لگایا۔

ابرارالحق نے ٹوئٹر پر بیان جاری کرتے ہوئے کہاکہ میں نے اپنا گانا ’نچ پنجابن‘ کسی بھارتی فلم کو نہیں بیچا اور اس کے ہرجانے کے دعوے کے لیے میں عدالت جانے کا حق رکھتا ہوں۔

تاہم بعد ازاں ٹی سیریز نے اپنے سوشل میڈیا پر جاری بیان میں کہا کہ ٹی سیریز نے گانے کے حقوق قانونی طور پر حاصل کیے ہیں اور یہ لالی وڈ کلاسکس کے یوٹیوب چینل پر بھی دستیاب ہے جو کہ پنجابی گانوں کو محفوظ کرنے والی کمپنی ون مووی باکس کی ملکیت ہے۔

بعد ازاں کرن جوہر نے فلم میں گانے کا کریڈٹ ابرار الحق کو بھی دے دیا تھا۔

Comments

یہ بھی پڑھیں