ورون دھون اور نتاشا دلال ننھی پری کے والدین بن گئے، بالی وڈ اداکار کے والد ہدایت کار ڈیوڈ دھون نے اس خبر کی تصدیق کردی۔
اسٹریٹ ڈانسر 3 کے اداکار کی اہلیہ نتاشا نے 3 جون کو ممبئی کے مقامی اسپتال میں پیاری سی بیٹی کو جنم دیا۔ اسپتال کے باہر ذرائع ابلاغ سے بات چیت کرتے ہوئے ورون کے والد ڈیوڈ نے پوتی کی پیدائش کی تصدیق کی اور نیک تمناؤں کا اظہار کرنے پر مداحوں کا شکریہ بھی ادا کیا۔
تاہم معروف ہدایت کار نے زچہ و بچہ کی صحت سے متعلق مزید کوئی بات نہیں بتائی، پاپا رازی فوٹوگرافر کے اکاؤنٹس میں سے ایک نے ڈیوڈ دھون کی ایک ویڈیو بھی شیئر کی ہے۔
ورون اور نتاشا نے فروری میں اعلان کیا تھا کہ وہ والدین بننے والے ہیں۔ اپنی اہلیہ کے ساتھ ایک تصویر شیئر کرتے ہوئے انہوں نے لکھا، ’آپ سب کی دعاؤں اور محبتوں کی ضرورت ہے۔‘
بالی وڈ اداکار اگلی فلم ’بے بی جان‘ میں نظر آئیں گے، خیال رہے کہ ورون دھون نے اپنی پرانی دوست نتاشا سے 2021 میں شادی کی تھی۔
