The news is by your side.

Advertisement

سبزی ‌فروش کی انتہائی کراہیت آمیز حرکت، ویڈیو وائرل

نئی دہلی : نالے کے گندے پانی سے سبزیاں دھونے والا نوجوان دیدہ دلیری سے یہ کام کرتا رہا، سوشل میڈیا پر وائرل ویڈیو دیکھ کر لوگوں کو الٹیاں لگ گئیں۔

بھارتی ریاست مدھیہ پردیش سے ایک خوفناک ویڈیو منظر عام پر آئی ہے جس میں دیکھا جاسکتا ہے کہ سڑک کے کنارے نالے پر ایک سبزی فروش دھنیے کی گڈیوں کو نالے کے پانی میں ڈبو رہا ہے۔

ویڈیو میں دکھایا گیا ہے کہ راہگیر کے سامنے ایک نو عمر لڑکا دھنیے کے گچھوں کو سڑک کے کنارے جمع ہونے والے نالے کے پانی میں ڈبو کر دھو رہا ہے۔

مذکورہ ویڈیو ٹوئٹر پر ایک بھارتی صارف نے شیئر کی ہے جس میں اس نے ڈسٹرکٹ کلکٹر، پولیس ڈی آئی جی اور متعلقہ حکام کو بھی ٹیگ کیا۔

ویڈیو میں دکھایا گیا ہے کہ شخص نالی کے پانی میں دھنیا دھو رہا ہے جبکہ اس موقع پر ویڈیو بنانے والا شخص اسے ایسا نہ کرنے کی تلقین کرتے ہوئے کہتا ہے کہ کیوں لوگوں کی صحت سے کھیل رہے ہو؟ تاہم سبزی فروش اسے نظر انداز کرکے اپنے کام پر لگا رہتا ہے۔

ویڈیو وائرل ہونے کے بعد بھوپال کے ضلع کلکٹر نے اس کا نوٹس لیتے ہوئے میونسپل کارپوریشن، محکمہ خوراک اور پولیس کو اس شخص کی شناخت کرنے اور معاملے کی تحقیقات کا حکم دیا ہے۔

محکمہ خوراک نے سبزی فروش کے خلاف تھانے میں ایف آئی آر درج کرائی، ایس ایچ او کے مطابق ویڈیو میں نظر آنے والا شخص شہر کی سبزی منڈی میں سبزی فروخت کرتا ہے۔

پولیس نے میڈیا کو بتایا کہ چھاپے کے وقت وہ اپنے گھر پر نہیں ملا اور اس کا فون بھی بند پایا گیا۔ پولیس کا کہنا تھا کہ اس کا سراغ لگا لیا گیا ہے اور جلد ہی اسے گرفتار کر لیا جائے گا۔

Comments

یہ بھی پڑھیں