کراچی : ڈیفنس تشدد کیس میں متاثرہ نوجوان نے سلمان فاروقی کو عدالت میں معاف کر دیا اور کہا عدالت جو بھی فیصلہ کرے مجھے کوئی اعتراض نہیں۔
تفصیلات کے مطابق جوڈیشل مجسٹریٹ جنوبی کی عدالت میں ڈیفنس میں نوجوان کو تشدد کا نشانہ بنانے کے کیس کی سماعت ہوئی۔
پولیس کی جانب سے ملزمان کو عدالت میں پیش کردیا گیا، ملزمان میں سلمان فاروقی اور اویس ہاشمی شامل ہیں۔
متاثرہ نوجوان سدھیر عدالت میں پیش ہوا اور ملزم سلمان فاروقی کو شناخت کرلیا۔
سدھیر نے کہا کہ مجھے علم میں نہیں تھا کہ مجھے عدالت نے بلایا ہے مجھے آج وکیل نے بتایا ہے تو میں پیش ہوگیا۔
عدالت نے پوچھا کہ تمہیں کسی قسم کا دباوٴ کا سامنا تو نہیں تو متاثر نوجوان نے عدالت میں بیان دیتے ہوئے کہا کہ میں کوئی کیس نہیں کرنا چاہتا میں نے ملزم کو معاف کردیا ہے، عدالت جو بھی فیصلہ کرے مجھے کوئی اعتراض نہیں۔
مزید پڑھیں : نوجوان تشدد کیس : عدالت میں پیشی پر وکیل نے سلمان فاروقی کو تھپڑ مار دیا
عدالت کی جانب سے ملزموں کو جوڈیشل ریمانڈ پر جیل بھیج دیا جبکہ تفتیشی افسر سے آئندہ سماعت پر پیش رفت رپورٹ طلب کرلی گئی۔
یاد رہے موٹرسائیکل کی معمولی ٹکر پر آپے سے باہر ہوکر ملزم سلمان فاروقی نے نوجوان پرگارڈز کے ساتھ ملکر تشدد کیا تھا۔
ملزم نے گالیاں اوردھمکیاں دیں اور نوجوان کی بہن ہاتھ جوڑتی رہی لیکن ملزم کے کان پرجوں تک نہ رینگی۔
ملزم نے خواتین کو بھی دھکے دیے ساتھ ہی جان سے مارنےکی دھمکیاں دیں، تشدد اور ہجوم میں بےعزت کیا۔
