ممبئی: بھارت میں سالگرہ کی پارٹی سے واپسی آنے والے میاں بیوی ایک کار کی ٹکر سے خوفناک حادثے کا شکار ہوگئے، حادثے میں میاں بیوی ہلاک ہوگئے۔
یہ خوفناک واقعہ بھارت کے جنوب ممبئی میں پیش آیا، جہاں سالگرہ کی پارٹی منا کر بائیک پر گھر لوٹنے والے اکبر داؤد اور کرن انور سگنل پر ایک نابالغ ڈرائیور کی کار ٹکرا گئی، کار کی رفتار انتہائی تیز ہونے کی وجہ سے دونوں بائیک سمیت کئی فٹ ہوا میں اچھل کر دور ڈیوائیڈر پر جاگرے۔
پولیس کے مطابق جاں بحق ہونے والے شخص اکبر کی سالگرہ منانے اس کی بیوی اور دیگر دوست ان کے ساتھ گئے تھے، سالگرہ کی پارٹی منا کر جب وہ لوٹ رہے تھے تو اس وقت یہ حادثہ پیش آیا۔
پولیس کا کہنا ہے کہ حادثے کا شکار ہونے والے دونوں متاثرین کو اسپتال میں داخل کرایا گیا تھا سر اور جسم کے دیگر حصوں میں شدید چوٹ لگنے اور زیادہ خون بہہ جانے کے سبب علاج کے دوران دونوں کی موت ہوگئی۔
سڑک حادثہ میں فوت ہونے والی خاتون کے اہل خانہ نے کہا کہ حادثہ کے فوراً بعد اگر انہیں طبی مدد فراہم کر دی جاتی توممکن تھا کہ کرن بچ جاتی، ان کا یہ بھی الزام تھا کہ حادثہ کے بعد تاخیر سے کرن کو اسپتال داخل کیا گیا تھا اس وقت تک بہت خون بہہ چکا تھا ۔
جبکہ پولیس نے کمسن لڑکے اور اس کے والد کے خلاف لاپروائی سے گاڑی چلانے، دو لوگوں کی موت کا سبب بننے اور دوسروں کی جان کا خطرے بننے کے تحت مقدمہ درج کرلیا ۔
