اسرائیلی فوج جنگ بندی کے بعد گھروں کو لوٹنے والے فلسطینیوں کو نشانہ بنانے لگی۔
الجزیرہ کے مطابق غزہ کے جنوبی شہر رفح میں اسرائیلی فوج کے حملے کی مزید تفصیلات سامنے آئی ہیں جس میں ایک شخص شہید اور متعدد زخمی ہوئے ہیں۔
سرکاری خبر رساں ایجنسی وفا کے مطابق، ایک اسرائیلی کواڈ کاپٹر نے شبورا کیمپ میں اپنے تباہ شدہ گھروں سے ملبہ صاف کرنے والے فلسطینیوں کے ایک گروپ پر گولیاں برسائیں۔
اس حملے میں شہید ہونے والے ایک فلسطینی کی شناخت 28 سالہ اکرم عاطف زانون کے نام سے ہوئی ہے جب کہ چار دیگر افراد زخمی ہوئے۔
بدھ کو اسرائیل اور حماس کے درمیان جنگ بندی کا چوتھا دن ہے تاہم اب بھی اسرائیلی حملوں کی اطلاعات موصول ہو رہی ہیں۔
دوسری جانب اسرائیل نے غزہ جنگ بندی معاہدے کے بعد مقبوضہ مغربی کنارے کے جنین شہر میں فوجی آپریشن کیا جس میں 9 فلسطینی جام شہادت نوش کرگئے جبکہ 40 زخمی ہوگئے۔
رپورٹس کے مطابق اسرائیلی آبادکاروں کی جانب سے بھی مغربی کنارے میں فلسطینیوں کی املاک پر حملوں کی اطلاعات سامنے آرہی ہیں۔
