بھارت میں بپھرے ہاتھی نے ہجوم میں کھڑے شخص کو اٹھا کر زمین پر پٹخ دیا جس کی ویڈیو سوشل میڈیا پر وائرل ہوگئی۔

بھارتی میڈیا رپورٹ کے مطابق بھارتی ریاست کیرالہ کے ضلع ملاپورم میں کل رات فیسٹیول کے دوران ہاتھی بپھر گیا جس نے ایک شخص کو اٹھا کر زمین پر پٹخ دیا۔

ہاتھی کے حملے کے نتیجے میں 17 افراد زخمی ہوئے جن میں سے ایک کی حالت نازک بتائی گئی ہے۔

رپورٹ کے مطابق پوتھیانگڈی میلے میں سینکڑوں لوگ شریک تھے، میلے میں پانچ ہاتھیوں کو بھی سنہری پلیٹوں سے مزین کیا گیا جب ہجوم میں موجود لوگوں نے ان کی ویڈیو بنانے کی کوشش کی تو ایک ہاتھی بپھر گیا۔

ویڈیو میں دیکھا جاسکتا ہے کہ ایک ہاتھی ہجوم میں کھڑے شخص کو اٹھا کر پٹخ دیتا ہے۔

ہاتھی کے حملے میں زخمی شخص کوٹاکل کے اسپتال میں زیر علاج ہے جبکہ واقعے کے بعد ہجوم میں خوف و ہراس پھیل گیا ہے۔