لاہور: جنرل اسپتال کے ڈاکٹرز کا ایک اور کارنامہ سامنے آیا ہے، جس میں ایک چھوٹی بچی کے معدے سے اینڈوسکوپی کے ذریعے ایک ہیئر کلپ کامیابی سے نکالا گیا۔
تفصیلات کے مطابق لاہور جنرل اسپتال کے ڈاکٹرز نے منفرد کارنامہ انجام دیتے ہوئے ایک طبی پروسیجر میں چونگی امر سدھو کی رہائشی ڈیڑھ سالہ بچی کے معدے سے اینڈوسکوپی کے ذریعے ہیئر کلپ نکال لیا۔
بچی اس شکایت کے ساتھ لائی گئی تھی کہ اس نے ہیئر کلپ نگل لیا ہے، الٹراساؤنڈ میں تصدیق ہونے کے بعد ڈاکٹروں نے اینڈوسکوپی کے ذریعے ہیئر کلپ نکالنے کا فیصلہ کیا۔
اینڈوسکوپی کا پروسیجر ڈاکٹر حسن سلمان ملک کی سربراہی میں کامیابی سے مکمل کیا گیا، کامیاب پروسیجر کر کے ڈاکٹرز نے ننھی بچی مومنہ فیصل کی جان بچا لی۔
پرنسپل پی جی ایم آئی پروفیسر الفرید ظفر نے ڈاکٹرز اور نرسز کی پیشہ وارانہ صلاحیتوں کو سراہا، ایم ایس ڈاکٹر فریاد حسین نے پیغام دیا کہ والدین نو عمر بچوں کو کھیلنے کے لیے چھوٹی اور تیز دھار اشیا ہرگز نہ دیں۔
