مکہ مکرمہ میں گزشتہ روز گرج چمک کے ساتھ طوفانی بارش ہوئی اس دوران آسمانی بجلی دنیا کے سب سے بلند کلاک ٹاور پر گر گئی۔
سعودی موسمیات کے قومی مرکز نے منگل کو طوفانی بارش کی پیشگوئی کی تھی جو 100 فیصد درست ثابت ہوئی اور مکہ مکرمہ سمیت اطراف میں گرج چمک اور طوفانی ہواؤں کے ساتھ موسلا دھار بارش ہوئی۔
اس دوران مسجد الحرام کے قریب دنیا کے سب سے بلند کلاک ٹاور پر آسمانی بجلی گری جس کی ویڈیو سوشل میڈیا پر وائرل ہوگئی۔
یہ اپنی نوعیت کا منفرد اور حیران کن منظر تھا، آسمانی بجلی گرنے کے دوران وہاں موجود لوگ اللہ اکبر اور کلمہ طیبہ کا ورد کرتے رہے۔
گرج چمک کے ساتھ بارش کے دوران کلارک ٹاور پر گرنے والی بجلی کے مناظر کی تصاویر حرمین کی انتظامیہ نے اپنے ٹوئٹر اکاونٹ پر شیئر کی ہیں۔
مکہ مکرمہ میں طوفانی بارش، زائرین طواف کعبہ کرتے رہے، ایمان افروز ویڈیوز
دوسری جانب مکہ مکرمہ میں گزشتہ روز طوفانی ہواؤں اور گرج چمک کے ساتھ موسلا دھار بارش کے دوران مسجد الحرام میں خانہ کعبہ کا طواف جاری رہا۔
