ایچ بی ایل پاکستان سپر لیگ 8 کا فائنل جیت کر لاہور قلندرز اپنے اعزاز کا دفاع کرنے میں کامیاب رہا شاندار کارکردگی پر اسٹیڈیم میں اس کے ایک پرستار نے منفرد انداز میں جشن منایا۔
اے آر وائی نیوز کے مطابق ایچ بی ایل پاکستان سپر لیگ 8 کے فائنل میں دفاعی چیمپئن لاہور قلندرز نے ایک سنسنی خیز اور دلچسپ مقابلے کے بعد ملتان سلطانز کو ایک رنز سے شکست دے کر نہ صرف اپنے اعزاز کا کامیاب دفاع کیا بلکہ 2022 کے فائنل کی تاریخ کو بھی دہرایا۔
لاہور قلندرز کی میچ میں شاندار کامیابی پر قذافی اسٹیڈیم میں موجود اس کے مداح بھی بے حد پر جوش اور خوش نظر آئے وہیں ایک مداح نے اپنی ٹیم کی فاتحانہ پرفارمنس کا جشن اس انداز سے منایا کہ وہاں موجود شائقین کرکٹ بھی اس سے محظوظ ہوئے اور اس والہانہ جشن کی ویڈیو کو لاہور قلندرز نے ٹوئٹر پر اپنی آفیشل سائٹ پر بھی پوسٹ کیا۔
اس مختصر ویڈیو میں دیکھا جا سکتا ہے کہ شائقین کرکٹ کے ایک اسٹینڈ کے اندر لاہور قلندرز کا ایک پرجوش مداح قلندرز کی ٹی شرٹ پہنے حفاظتی جالیوں کے قریب آکر ڈانس کرتا ہے۔
مذکورہ شائق اس دوران باجا بجاتے ہوئے ٹھمکے لگاتا ہے اور کرکٹرز کو سلام تحسین پیش کرنے کے ساتھ ناگن ڈانس جیسا انداز بھی اختیار کرتا ہے۔
نوجوان کے اس انداز جشن کو دیکھ کر اسٹیڈیم میں موجود شائقین بے حد محظوظ ہوئے اور چند لمحوں کے لیے تو شائقین کرکٹ کی نظریں گراؤنڈ سے ہٹ کر اس پرجوش شائق کی جانب مبذول ہوگئی تھیں۔
🥳Mood Right Now 🏆 pic.twitter.com/O2Jqteu6gm
— Lahore Qalandars (@lahoreqalandars) March 18, 2023
اس دلچسپ ویڈیو کو اب تک لاکھوں صارفین دیکھ کر پسندیدگی کا اظہار کر چکے ہیں اور اس پر دلچسپ تبصرے بھی جاری ہیں۔
