عیدالاضحیٰ پر مسلمان سنت ابراہیمی کی پیروی کرتے ہوئے اللہ کی راہ میں جانور قربان کرتے ہیں ایک خاندان ہر سال 50 بیلوں کی قربانی کرتا ہے۔
عیدالاضحیٰ کی آمد قریب آ چکی ہے۔ اس موقع پر ہر صاحب استطاعت مسلمان سنت ابراہیمی کی پیروی کرتے ہوئے اللہ کی راہ میں جانوروں کی قربانی پیش کرتا ہے۔ کچھ لوگ ایک اور کئی صاحب حیثیت افراد ایک سے زائد جانور قربان کرتے ہیں۔
لیکن پاکستان میں ایک ایسا خاندان بھی ہے جو گزشتہ 16 برس سے ہر سال عیدالاضحیٰ پر 50 بیل اللہ کی راہ میں قربان کرتا ہے۔
یہ خوش نصیب خاندان پنجاب کے شہر فیصل آباد کی ڈی ٹائپ کالونی کا رہائشی ہے اور اس مقصد کے لیے اس خاندان نے ایک چھوٹا سا باڑا بنا رکھا ہے جہاں یہ قربانی کے لیے لائے گئے بیل باندھتے ہیں۔
شامیانوں کے سائے میں بندھے تنومند فربہ بیل دیکھنے کے لیے نہ صرف محلے کے بچے سارا دن یہاں موجود رہتے ہیں بلکہ دور دور سے لوگ ان کا جذبہ قربانی دیکھنے کے لیے آتے ہیں۔
فیصل آباد کی ڈی ٹائپ کالونی کے رہائشی خاندان کے سربراہ طارق مدولہ ہیں، جو گزشتہ سولہ سال سے عیدالاضحیٰ پر پچاس بیلوں کی قربانی دے رہے ہیں۔
شامیانوں کے سائے میں ساہیوال، نقرہ، براہمن، جرسی، فائٹر بل سمیت نایاب نسل کے خوبصورت اور دراز قد بیل بندھے ہوتے ہیں اور اس چھوٹے سے باڑے پر نہ صرف بندھے علاقے کے بچے سارا دن موجود رہتے ہیں بلکہ دور دراز سے بھی لوگ یہ بیل دیکھنے آتے ہیں اور ان بیلوں کے ساتھ سیلفیاں بناتے ہیں۔
طارق مدولہ نے بتایا کہ ان قد آور اور خوبصورت بیلوں کی قیمت 5 سے 15 لاکھ روپے تک ہے۔ ان کی چوبیس گھنٹے دیکھ بھال، خوراک کے انتظام اور صفائی کے لیے تین افراد ہر وقت متعین ہوتے ہیں۔
صرف یہی نہیں بلکہ بیماریوں سے بچانے کے لیے ان بیلوں کی ویکسی نیشن بھی کروائی جاتی ہے۔ عید پر بیلوں کے گوشت کا بڑا حصہ مستحق اور نادار افراد میں تقسیم کیا جاتا ہے۔
ہر سال 50 خوبصورت اور صحتمند بیلوں کی اجتماعی قربانی کر کے یہ خاندان جہاں سنت ابراہیمی پر عمل پیرا ہوتا ہے وہاں دوسروں کے لیے خدمت خلق کی قابل تقلید مثال بھی قائم کرتا ہے جس کو لوگ سراہتے ہیں۔
