کراچی: پاکستان اور ویتنام کے درمیان حلال سی فوڈ تعاون میں وسعت پیدا ہوئی ہے، اور برآمدات میں 20 فی صد اضافہ ہو گیا ہے۔
پاکستان میں ویتنام کے سفیر نگوین ٹین فونگ اور پاکستان فشریز ایکسپورٹرز ایسوسی ایشن کے نمائندگان کے درمیان اجلاس منعقد ہوا، جس میں دونوں ممالک کے درمیان حلال سی فوڈ تعاون کے حوالے سے بات چیت ہوئی۔
ڈائریکٹر جنرل میرین فشریز ڈپارٹمنٹ ڈاکٹر منصور علی وسان نے بتایا کہ گزشتہ سال پاکستان کی ویتنام کو سی فوڈ برآمدات 90 لاکھ امریکی ڈالر تک پہنچ گئیں، اور آندہ 5 سالوں میں سالانہ 2.5 سے 3 کروڑ ڈالر کی برآمدات کا ہدف قابلِ حصول ہے۔
ویتنامی سفیر نگوین ٹین فونگ نے دونوں ممالک میں ہم آہنگی اور تکنیکی تعاون کے فروغ کے ذریعے روابط مزید مستحکم کرنے پر زور دیا، سفیر نے کہا ویتنام پاکستان کو برآمد کیے جانے والی سی فوڈ کی تیاری میں مکمل طور پر حلال معیار کو یقینی بناتا ہے۔
صارفین تیار ہوجائیں ! یکم جولائی سے گیس کا اضافی بل دینا ہوگا
واضح رہے کہ پاکستان اور ویتنام اپنے دوطرفہ تجارتی تعلقات کو مضبوط بنانے کے لیے سرگرم عمل ہیں، سالانہ تجارت کا ہدف 3 ارب ڈالر ہے، جب کہ موجودہ تجارتی حجم اس ہدف سے کم ہے، تاہم اس میں مسلسل نمو دیکھنے میں آئی ہے، جو 2024 میں 850 ملین ڈالر تک پہنچ گئی۔
پاکستان کی ویتنام کو برآمدات، بشمول کپاس اور چمڑے جیسی اشیا بڑھ رہی ہیں، جب کہ ویتنام کی پاکستان کو برآمدات جیسے کہ الیکٹرانکس اور ٹیکسٹائل، بھی مجموعی تجارتی حجم میں حصہ ڈال رہی ہیں۔
