لاہور : ایس او پیز کی خلاف ورزی کے باعث ملک میں کرونا وبا کی تیسری لہر کے خوفناک اثرات دیکھے جارہے ہیں ، ایسا ہی واقعہ آج سپریم کورٹ لاہور رجسٹری میں پیش آیا۔
تفصیلات کے مطابق سپریم کورٹ لاہور رجسٹری میں این اے 75 ڈسکہ سے متعلق دائر درخواست پر سماعت جاری تھی، پی ٹی آئی کی جانب سے ان کے وکیل سمیت کیس سے متعلق تمام افراد عدالت عظمیٰ میں موجود تھیں۔
این اے 75 ڈسکہ سے لیگی امیدوار نوشین حامد اپنے معاون وکلا کے ہمراہ عدالت عظمیٰ میں موجود تھیں، کیس کی سماعت جاری تھی کہ نون لیگ کے وکیل سلمان اکرم راجہ عدالت میں وارد ہوگئے۔
سلمان اکرم راجہ ایک ہفتے قبل کرونا وائرس کا شکار ہوئے تھے، کرونا مثبت آنے کے بعد انہیں چودہ دن کا قرنطینہ مکمل کرنا تھا مگر انہوں نے کھلم کھلا اس کی خلاف ورزی کی اور عدالت میں جاپہنچے۔
سماعت کے دوران جسٹس عمر عطا بندیال نے لیگی وکیل کو مخاطب کرتے ہوئے کہا کہ راجہ صاحب آپ کو کرونا انفیکشن بھی ہے، کیا کرونا کی وجہ سے درد محسوس کر رہے ہیں، اگر تیاری نہیں ہے تو وقت لے لیں مگر مہربانی کریں حقائق پر مبنی مواد پیش کریں۔
