کویت سٹی : کویت میں ہائی ویز پر موٹر سائیکلوں کی "ڈیلیوری” پر پابندی کے نئے فیصلے پر عملدرآمد شروع کردیا گیا، قانون کی خلاف ورزی کرنے والوں کو سخت ترین سزا کا اعلان کیا گیا ہے۔
تفصیلات کے مطابق باخبر سیکیورٹی ذرائع نے میڈیا کو شاہراہوں پر”موٹر سائیکل ڈیلیوری” پر پابندی کے فیصلے پر عمل درآمد کا انکشاف کیا جسے وزارت داخلہ نے گزشتہ روز اتوار سے نافذ ہونے کا اعلان کیا ۔
ذرائع نے بتایا کہ اس فیصلے پر عمل درآمد فیڈریشن آف ریسٹورنٹس اینڈ ڈیلیوری کمپنیوں کے ساتھ اس معاہدے کے بعد کیا گیا ہے کہ ہر موٹر سائیکل میں ایسے آلات نصب کیے جائیں گے جو موٹر سائیکل سوار کو چلنے کا راستہ دکھا سکیں گے۔
ٹریفک کی خلاف ورزی پر قانونی اقدامات کرنے اور دوبارہ خلاف ورزی کی صورت میں موٹر سائیکل سوار کو قانون کی پاسداری اور احترام نہ کرنے پر ملک بدر کر دیا جائے گا۔
وزارت داخلہ نے یہ شرط عائد کی کہ تمام ڈیلیوری کمپنیاں اور ریستوران ڈیلیوری بائیک کے ڈرائیوروں کو پابند کریں کہ وہ ہیلمٹ پہننے سے متعلق احتیاطی تقاضوں کی پابندی کریں اور موٹر سائیکل کے باکس پر ایک عکاس اسٹیکر لگائیں تاکہ دوسرے موٹر سوار اسے رات کے وقت دیکھ سکیں۔
ذرائع نے باور کرایا ہے کہ شاہراہوں پر موٹر سائیکل پر کی جانے والی ڈلیوری پر پابندی اور ایک گورنری سے دوسرے گورنری میں نہ جانے کا فیصلہ بڑی تعداد میں ہونے والے ٹریفک حادثات کی وجہ سے کیا گیا ہے جس کے نتیجے میں ڈیلیوری کرنے والے کارکنان شدید زخمی اور بعض اوقات ایسے حادثے ان کی موت کا باعث بن جاتے ہیں۔
متعلقہ حکام کے مطابق اس فیصلے کی خلاف ورزی کرنے والے کارکنان کو گرفتار کرکے سخت سزا دی جائے گی جبکہ دوبارہ خلاف ورزی کرنے پر موٹر سائیکل کو ضبط کر لیا جائے گا اور اس کے ڈرائیور کو ملکی قوانین کی خلاف ورزی کرنے پر ملک سے نکال دیا جائے گا۔
