اسٹاک ہوم سے میامی جانے والی پرواز اچانک ہچکولے کھانے لگی جس کے باعث مسافروں میں چیخ و پکار مچ گئی۔
غیرملکی خبررساں ادارے کی رپورٹ کے مطابق اسٹاک ہوم سے میامی جانے والا اسکینڈ ینیوین ایئرلائنز کا طیارہ ٹریبولینس کی وجہ سے شمالی بحراوقیانوس کے اوپر ہچکولے کھانے لگا، اسمارٹ فون سے بنائی گئی ویڈیو میں خوفناک لمحات قید ہوگئے۔
طیارے میں مسافروں کی چیخ و پکار مچ گئی اور کئی مسافر چھت سے ٹکرا گئے۔ طیارے نے جمعہ کی سہ پہر میامی کے لیے اڑان بھری تھی۔
ویڈیو میں دیکھا جاسکتا ہے کہ مسافر اپنی نشستوں سے اٹھ کر کیبن کے ارد گرد موجود ہیں۔
ایئرلائن انتظامیہ کا کہنا ہے کہ طیارے میں 254 مسافر اور ایک بچہ موجود تھا جبکہ واقعے میں ایک شخص کے معمولی زخمی ہونے کی اطلاعات ہیں۔
بعدازاں ہنگامی طور پر طیارے کا رخ کوپن ہیگن کی جانب موڑ دیا گیا جہاں پرواز نے باحفاظت لینڈنگ کی۔
