بھارت میں بپھرے بیل کے بینک میں گھسنے پر افرا تفری مچ گئی جس کی ویڈیو سوشل میڈیا پر وائرل ہورہی ہے۔
بھارتی میڈیا رپورٹس کے مطابق ریاست اترپردیش کے شہر اناؤ کی اسٹیٹ بینک آف انڈیا (ایس بی آئی) کی شاہ گنج برانچ میں بپھرا بیل گھس گیا جس کے بعد لوگ ڈر کے مارے ادھر اُدھر بھاگنے لگے۔
سماجی رابطے کی ویب سائٹ ایکس (ٹوئٹر) پر کمار منیش نامی صارف نے ویڈیو شیئر کی اور لکھا کہ ’ایس بی آئی بینک کا عملہ بیل سے کہہ رہا ہے کہ ابھی کھانے کا وقفہ ہے۔‘
ویڈیو میں دیکھا جاسکتا ہے کہ بیل بینک کے اندر موجود ہے جبکہ عملے کی جانب سے لوگوں سے کہا جارہا کہ ادھر سے ہٹ جائیں اور پیچھے کی طرف آجائیں۔
ویڈیو کے آخر میں سیکیورٹی گارڈ کو چھڑی کی مدد سے بیل کو بھگاتے ہوئے دیکھا جاسکتا ہے، خوش قسمتی سے بیل نے کسی کو کوئی نقصان نہیں پہنچایا۔
SBI bank to bull: Abhi Lunch Time Hai pic.twitter.com/m6vtYgnyJP
— Kumar Manish (@kumarmanish9) January 10, 2024
مذکورہ ویڈیو سوشل میڈیا پر تیزی سے وائرل ہورہی ہے اور صارفین کی جانب سے اس پر دلچسپ تبصرے کیے جارہے ہیں۔
ایک صارف نے لکھا کہ ’کھانے کے وقفے کے دوران وہ بیل کو نہیں سنبھال سکتے۔‘ دوسرے صارف نے لکھا کہ ’بیل بھی اکاؤنٹ کھلوانے آیا ہے۔‘ کئی صارفین نے مسکرانے کی ایموجیز بنائیں۔
