مسجد نبوی ﷺ کے موذن شیخ مہدی باری کی ایام حج کے دوران زمین سے ہزاروں فٹ بلند ہیلی کاپٹر میں اذان دینے کی خوبصورت ویڈیو وائرل ہو گئی۔
اسلام کی دوسری اہم ترین مسجد مسجد نبوی ﷺ کو دین اسلام میں اہم مقام حاصل ہے۔ ہجرت کے بعد یہیں سے اسلام کی ترویج وترقی کا سلسلہ شروع ہوا اور آدھی سے زیادہ دنیا میں اسلام کا پرچم لہرایا۔
اس وقت ایام حج جاری ہیں اور ان مبارک ایام کے دوران مسجد نبوی ﷺ کے موذن شیخ مہدی باری کی زمین سے ہزاروں فٹ بلند فضا میں ہیلی کاپٹر میں اذان دینے کی مسحور کن ویڈیو وائرل ہو رہی ہے۔
سوشل میڈیا پر حرمین شریفین کی معلومات اور اطلاعات فراہم کرنے والے ہینڈل حرمین ایک خوبصورت ویڈیو پوسٹ کی ہے جس میں دیکھا جا سکتا ہے کہ مدینہ منورہ کی پرکیف فضاؤں میں مسجد نبوی ﷺ کے موذن شیخ مہدی باری ہیلی کاپٹر میں محو سفر ہیں اور اس دوران وہ اپنے خوبصورت انداز میں اذان دے رہے ہیں۔
شیخ مہدی باری کی خوبصورت طرز اور لحن میں اذان کی آواز سننے اور دیکھنے والوں کے کانوں میں رس گھول اور ایک وجد طاری کر رہی ہے۔
واضح رہے کہ رواں سال حج کا رکن اعظم وقوف عرفات گزشتہ روز ادا کر دیا گیا۔ 18 لاکھ سے زائد افراد نے حج کا فریضہ ادا کیا۔ خطبہ حج اردو سمیت 50 زبانوں میں دنیا بھر میں براہ راست نشر کیا گیا۔
حجاج کرام نے آج بڑے شیطان کی رمی کے بعد قربانی پیش کر کے سر منڈوایا اور احرام اتار دیا۔
خوش نصیب حجاج کرام طواف زیارت اور سعی کرنے کے بعد منیٰ کی جانب واپس لوٹ رہے ہیں۔ یہاں وہ مزید دو دن قیام کے دوران رمی بھی کریں گے۔
حجاج کرام 12 ذی الحج کو مغرب سے قبل وادی منیٰ سے نکل جائیں گے اور یوں ان کا حج کے فریضے کا عمل مکمل ہو جائے گا۔
