کینیڈا میں شادی کے فوٹو شوٹ کے دوران بھارتی نژاد دلہن جھلس گئی جس کی ویڈیو سوشل میڈیا پر وائرل ہوگئی۔
بھارتی میڈیا رپورٹ کے مطابق کینیڈا میں مقیم بھارتی نژاد جوڑے وکی اور پیا نے شادی کو یادگار بنانے کے لیے فوٹو شوٹ کروانا چاہا لیکن وہ ڈراؤنے خواب میں بدل گیا۔
شادی کے موقع پر رنگ بھرا دھماکا کرنے والا آلہ ’کلر بم‘ خراب ہوگیا جس سے دلہن کو شدید چوٹیں آئیں۔
واقعے کی ویڈیو جوڑے نے انسٹاگرام پر شیئر کی جس میں دیکھا جاسکتا ہے کہ کس طرح یہ دھماکا دلہن کو براہ راست لگا ہے۔
دراصل دولہا اور دلہن نے شادی کی یادگار تصویر کے لیے رنگ بھرے دھماکے کا انتظام کیا تھا تاکہ تصویر کے پیچھے کا منظر خوبصورت دکھائی دے۔
لیکن جیسے ہی دولہا نے دلہن کو تصویر کے لیے اٹھایا تو کلر بم خراب ہوگیا اور دلہن کو براہ راست لگا اس حادثے مین دلہن کی پیٹھ اور بال جھلس گئے جس کے بعد انہیں فوری طبی امداد کی ضرورت پڑی۔
جوڑے نے اپنی پوسٹ میں لکھا: ’’ہماری منصوبہ بندی یہ تھی کہ پس منظر میں خوبصورت رنگ بھرے دھماکے ہوں، تاکہ ایک شاندار تصویر بن سکے۔ لیکن آلہ خراب ہوگیا اور ہم پر دھماکا ہوگیا۔ ہم اپنے بچے کو بھی ساتھ لینے والے تھے۔‘‘
جوڑے نے انسٹاگرام اسٹوری میں بتایا کہ یہ واقعہ شادی کی تقریب اور ولیمہ کے درمیان تصاویر بناتے وقت پیش آیا۔ انہوں نے کہا: ’’ہم جلدی سے قریبی اسپتال گئے، جہاں جھلسنے کا علاج کروایا گیا۔ اس کے بعد ہم ولیمہ میں شریک ہوئے۔‘‘
انہوں نے اپنی پوسٹ کے ذریعے لوگوں کو خبردار کیا: ’’یہ پوسٹ کلر بم جیسے پٹاخوں کے استعمال کے خطرات کے بارے میں ہے۔ ہم نے تمام حفاظتی اقدامات پر عمل کیا، لیکن پھر بھی کچھ غلط ہوگیا اور ہم زخمی ہوگئے۔ چاہے آپ نظرِ بد پر یقین رکھتے ہوں یا نہیں، ہم ضرور یقین رکھتے ہیں!‘‘
