بھارتی حیدرآباد سے کوالالمپور جانے والا ملیشین ایئر لائنز کا طیارہ خوفناک حادثے سے بال بال بچ گیا، ٹیک آف کے 15 منٹ کے بعد جہاز کے ایک انجن میں اچانک آگ بھڑک اُٹھی۔
بین الاقوامی خبر رساں ادارے کی رپورٹ کے مطابق پائلٹ نے خطرہ محسوس کرتے ہوئے لینڈنگ کی اجازت طلب کی جس پر اسے لینڈنگ کی اجازت مل گئی اور طیارے نے بحفاظت لینڈنگ کی۔ طیارے میں 138 مسافر سوار تھے۔
اس سے قبل ممبئی میں دو طیاروں نے خطرے سے دوچار ہوتے ہوئے، رن پر اترنے اور ٹیک آف کرنے کے سلسلے میں بالکل ایک فلمی اسٹنٹ کی طرح کا منظر پیش کیا۔
وائرل ویڈیو میں دیکھا جا سکتا ہے کہ ممبئی ایئرپورٹ پر 2 طیارے بالکل ایک ہی وقت میں ایک ہی رن وے پر اترتے اور ٹیک آف کر رہے ہیں، بھارتی سول ایوی ایشن کے ڈی جی نے اس واقعے کی جانچ کا حکم دے دیا ہے۔
ہفتے کے روز ممبئی ایئرپورٹ پر اس وقت ایک بڑا حادثہ ہوتے ہوتے رہ گیا، جب انڈیگو کا ایک طیارہ رن پر اتر رہا تھا، اور ایئر انڈیا کا طیارہ ایک منٹ سے بھی کم وقت میں اِسی رن وے سے ٹیک آف کر رہا تھا۔
سوشل میڈیا پلیٹ فارمز پر وائرل ویڈیو دیکھ کر صارفین بھی حیران رہ گئے، اور انھوں نے حفاظتی خدشات سخت تشویش کا اظہار کیا۔ دوسری طرف ڈی جی سی اے نے ایک بیان میں کہا کہ واقعے کے وقت ڈیوٹی کرنے والے ایئر ٹریفک کنٹرولر کو برطرف کر دیا گیا ہے۔
