حیدرآباد: بھارتی ریاست تلنگانہ کے ایک علاقے میں مچھلیوں سے بھرا ٹرک الٹ گیا، عوام مچھلیاں لوٹنے کے لیے ٹوٹ پڑے، جس کی ویڈیو وائرل ہو گئی ہے۔
ریاست تلنگانہ کے ضلع محبوب آباد میں مچھلیاں لے جانے والا ایک ٹرک بے قابو ہو کر الٹ گیا، اور تمام مچھلیاں سڑک پر پھیل گئیں، مقامی لوگ ان مچھلیوں کو مال غنیمت سمجھ کر ٹوٹ پڑے۔
کچھ شہریوں نے لوٹ مار کے اس منظر کو موبائل کیمروں میں ریکارڈ کر لیا، یہ ویڈیوز سوشل میڈیا پر دیکھتے ہی دیکھتے وائرل ہو گئیں۔ واضح رہے کہ پیٹرول سے بھرے ٹینکر الٹنے کے واقعات تو ہوتے رہتے ہیں اور لوگ پیٹرول لوٹنے بھی آ جاتے ہیں لیکن تلنگانہ میں مچھلی سے بھرے ٹرک کا یہ واقعہ منفرد تھا، ماضی میں جنوری 2021 میں چھتیس گڑ کے شہر رائے پور میں مچھلیوں سے بھرا ٹرک الٹا تھا۔
ویڈیوز میں دیکھا جا سکتا ہے کہ لوگ مچھلی لوٹنے کے لیے ایک دوسرے پر سبقت لے جانے کی کوشش کر رہے ہیں، معلوم ہوا کہ یہ ٹرک کھمّم ضلع سے ورنگل ضلع کی سمت جا رہا تھا کہ اس کے ڈرائیور نے اس کا توازن کھو دیا اور ٹرک الٹ گیا۔
حادثے میں ایک شخص کے زخمی ہونے کی اطلاع ہے، حادثے کے باعث سڑک پر ٹریفک بھی جام ہو گیا تھا، جسے بعد ازاں پولیس اہلکاروں نے بحال کر دیا۔
