شکاگو: امریکی شہر شکاگو میں ایک گھر کے مالک نے فرائنگ پین سے چور کا مار مار کر بھرکس نکال دیا، اس واقعے کی سی سی ٹی وی فوٹیج سوشل میڈیا پر وائرل ہو گئی ہے۔
ایکس پر ایک وائرل ویڈیو میں دیکھا جا سکتا ہے کہ شکاگو کے ایک رہائشی نے فرائنگ پین کا بہ طور ہتھیار استعمال کرتے ہوئے گھر میں گھسنے والے چور کو پیٹا، اور آخر کار پولیس کے ہاتھوں گرفتار کروایا۔
وائرل ویڈیو کو ایکس پر دس لاکھ سے زیادہ افراد نے دیکھا، یہ ویڈیو جیسن ولیمز نامی شہری نے شیئر کی تھی، انھوں نے بتایا کہ وہ کام سے گھر آ رہے تھے کہ گھر کے قریب ہی انھیں الارم سسٹم سے گھر میں نقب زنی کی اطلاع ملی۔
جیسن ولیمز نے مزید بتایا ’’الرٹ ملنے کے بعد میں تیزی سے گھر پہنچا، گھر میں داخل ہونے کے بعد میں نے کوئی ہتھیار تلاش کیا تو میرے ہاتھ ایک فرائنگ پین لگا، میں نے اسے پکڑ لیا اور جیسے ہی چور نیچے آیا، میں نے اس پر حملہ کیا۔‘‘
Here is the video of the burglar being caught: got some good licks inside and the back. Keystone cops theme should be added for laughs. I’m ok. Guys gonna have a headache tomorrow and was taken away by the ambulance. pic.twitter.com/ry1hr89A54
— Jason Williams (@Bashido) June 20, 2024
20 جون کو شیئر ہونے والی ویڈیو میں دیکھا جا سکتا ہے کہ گھر کا مالک چور کا باغیچے میں تعاقب کر رہا ہے، اور دوڑتے دوڑتے چور کو فرائنگ پین کی ضربیں لگا رہا ہے، بعد ازاں شکاگو پولیس مدد کے لیے عین وقت پر پہنچی، اور چور کو سڑک کے پار پکڑ لیا۔
ولیمز نے میڈیا کو بتایا کہ یہ لڑو یا بھاگ جاؤ والی صورت حال تھی، اور اس نے لڑنے کا انتخاب کیا۔
