عیدالاضحیٰ پر قربانی کے لیے لوگ تگڑے جانور خرید رہے ہیں ایسے ہی ایک تگڑے ٹارزن نما بکرے نے ٹکریں مار کر دیوار توڑ دی۔
عیدالاضحی کی آمد میں صرف ایک روز باقی ہے۔ اکثر نے قربانی کے جانور خرید لیے ہیں اور جو اب تک نہیں خرید سکے وہ منڈیوں کے چکر لگا رہے ہیں۔
قربانی کے لیے لوگ خوبصورتی کے ساتھ صحتمند اور تنومند جانور خرید رہے ہیں۔ بعض اوقات غیر معمولی صحت مند جانور اپنے مالکان کے لیے کسی مشکل کا باعث بن جاتے ہیں جیسا کہ یہ ٹارزن نما بکرا۔
ایک ویڈیو سوشل میڈیا پر تیزی سے وائرل ہو رہی ہے۔ اس کے مقام کا تو پتہ نہیں لیکن اس میں ایک کمرے میں قربانی کے لیے خریدے گئے ایک صحتمند بکرے کو بندھے ہوئے دکھایا گیا ہے۔
بکرے میاں شاید اپنی تنہائی سے گھبرائے یا اس طرح قید کیے جانے نے ان کا موڈ خراب کیا کہ جب غصہ چڑھا تو مضبوط دیوار اس کے سامنے ریت ثابت ہوئی۔
ویڈیو بنانے والے نے بھی اس میں موقع کے مناسبت سے فلموں میں ایکشن سین کے دوران استعمال ہونے والا بیک گراؤنڈ میوزک کا استعمال کیا ہے۔
بکرے میاں کئی ٹکریں مارنے کے بعد بالاًخر یہ مضبوط دیوار گرانے میں کامیاب رہتے ہیں اور اپنے انداز میں اچھل کر اس پر خوشی کا اظہار بھی کرتے ہیں۔
اس ویڈیو پر صارفین کی جانب سے بہت دلچسپ تبصرے کیے جا رہے ہیں۔
ایک شرارتی صارف نے حال ہی میں ملیر جیل سے قیدیوں کے فرار کو یاد کرتے ہوئے لکھ ڈالا کہ اب پتہ چلا جیل کی دیوار کس نے توڑی تھی۔ صارفین بکرے کو ٹارزن بھی قرار دے رہے ہیں۔
راکٹ نامی قربانی کا بیل گھر آتے ہی راکٹ کی طرح اُڑ گیا، وائرل ویڈیو
