بھارت میں 13ویں منزل سے گرنے والے شیرخوار بچی کو شہری نے حاضر دماغی سے بچا لیا۔
بھارتی میڈیا رپورٹس کے مطابق ریاست مہاراشٹر کے شہر تھانے میں کثیر المنزلہ عمارت کے 13ویں فلور کی بالکونی سے دو سال کی بچی کھیلتے ہوئے گری۔
ایک شخص کی حاضر دماغی کی بدولت بچی کی جان بچ گئی جس کی ویڈیو سوشل میڈیا پر وائرل ہوگئی۔
سوشل میڈیا صارفین کی جانب سے مذکورہ شخص کی تعریف کی جارہی ہے اور اسے حقیقی زندگی کا ہیرو قرار دیا جارہا ہے۔
رپورٹ کے مطابق واقعہ گزشتہ ہفتے دیویچا پاڈا کے علاقے میں پیش آیا تھا اور بچی کو معمولی زخم آئے ہیں۔
ویڈیو میں بھاویش مہاتر کو بچی کو پکڑنے کے لیے دور سے بھاگتے آتے دیکھا جاسکتا ہے اگر چہ وہ اسے پوری طرح پکڑ نہیں سکا لیکن اس کے ہاتھ لگنے کی وجہ سے بچی کے گرنے کی رفتار کم ہوگئی جس کی وجہ سے وہ معمولی زخمی ہوئی۔
عینی شاہدین کے مطابق بچی 13ویں منزل کے فلیٹ کی بالکونی سے کھیلتے ہوئے گری۔ ایک عینی شاہد کا کہنا ہے کہ بچی پھسل کر کچھ دیر تک لٹکی رہی اور پھر نیچے آگری۔
بھاویش مہاترے کا کہنا ہے کہ وہ عمارت کے پاس سے گزر رہے تھے کہ اچانک بچی پر نظر پڑی تو کچھ نہ سوچا اور اس کی جان بچانے کے لیے دوڑ لگادی۔
