چیکنگ کے دوران گاڑی روکنے پر نوجوان آگ بگولہ ہوگیا، بدتمیزی اور فحش کلامی کی انتہا کرتے ہوئے پولیس کے محکمے کی دھجیاں اڑادیں۔
اے آر وائی کے رپورٹر جام فرید لاکھو کے مطابق حیدرآباد میں پولیس کی جانب سے دوران چیکنگ گاڑی روکنے پر نوجوان آپے سے باہر ہوگیا، اہلکاروں کو کہا کہ میں وڈیرے کا بیٹا ہوں، نوجوان نے پولیس اہلکاروں کو گالیاں دیں، اہلکار خاموش کھڑے رہے۔
اے ایس آئی اظہر نے نوجوان سے گفتگو کرتے ہوئے کہا کہ اے ایس آئی ہوں تمیز سے بات کریں، اس پر نوجوان کا کہنا تھا کہ اے ایس آئی کی اوقات کیا ہے ہمارا نوکر ہے ان کی آنکھیں نکال دونگا۔
نوجوان نے مزید کہا کہ جانتے نہیں میں سلیم باجاری کا بیٹا ہوں، گاڑی کیسے روکی ہے، ایسے لوگ ہمیں روکیں گے، 4،4 اے ایس آئی گاڑی میں لےکر گھومتا ہوں۔
پولیس اہلکار کی جانب سے نوجوان کو شناخت کرانے کی ہدایت کرتے ہوئے کہا گیا کہ آپ کا نام کیا ہے اپنی شناخت کرائیں، اس پر نوجوان نے کہا کہ سلیم باجاری کا بیٹا ہوں تمہیں نام بتانا لازمی نہیں سمجھتا۔
اے ایس آئی اظہر نے نوجوان کو کہا کہ میں سلیم باجاری کے پاس آرہا ہوں آپ جائیں یہاں سے، نوجوان پولیس اہلکاروں کو گالیاں دیتے ہوئے چلتا بنا، اہلکار دیکھتے رہے، پولیس نے بتایا کہ نوجوان وزیراعلیٰ سندھ کے پرائیویٹ سیکریٹری سلیم باجاری کا بیٹا ہے۔
