بھارت میں جوس نکالنے والی مشین میں خاتون کے بال پھنس گئے جس کی ویڈیو منظرعام پر آگئی۔
بھارتی میڈیا رپورٹ کے مطابق ضلع محبوب آباد کے علاقے ڈورنکل ٹاؤن میں ایک افسوسناک واقعہ پیش آیا جہاں خاتون جو گنے کے جوس کا کاروبار کرتی ہے وہ بڑی مشکل میں پھنس گئی۔
حادثہ اس وقت پیش آیا جب خاتون گنے کے جوس نکالنے والی مشین پر کام کررہی تھی، اچانک اس کے بال مشین میں پھنس گئے۔
مقامی لوگوں نے حاضر دماغی کا مظاہرہ کرتے ہوئے فوراً بجلی کی سپلائی منقطع کردی تاکہ مشین مزید حرکت نہ کرسکے اور خاتون کو کوئی بڑا نقصان نہ پہنچے۔
بعدازاں لوگوں نے احتیاط سے مشین کے پہیوں کو الٹا گھما کر خاتون کے بالوں کو نکالا جس سے وہ بچ گئی۔
اچانک حادثے کے بعد خاتون خوفزدہ تھی لیکن مقامی افراد کی بروقت کارروائی کی بدولت وہ کسی بڑے حادثے سے محفوظ رہی۔
شہریوں نے مقامی حکام سے مطالبہ کیا کہ وہ عوام میں شعور بیدار کریں اور حفاظتی تدابیر پر عمل کرنے کی ہدایت دیں تاکہ مستقبل میں ایسے واقعات نہ ہوں۔
