اسلام آباد: پشاور روڈ پر گولڑہ موڑ کے قریب دیوار گرنے سے 12 مزدور جاں بحق ہو گئے۔
تفصیلات کے مطابق اسلام آباد اور راولپنڈی میں موسلادھار بارش کے دوران پشاور روڈ پر گولڑہ موڑ کے قریب ایک نہایت افسوس ناک حادثہ پیش آیا ہے، دیوار گرنے کے باعث بارہ مزدور دب کر جاں بحق ہو گئے۔
پولیس حکام کے مطابق جائے حادثہ پر امدادی ٹیموں نے مشین کی مدد سے بارہ افراد کی لاشیں نکال لی ہیں، ملبے تلے مزید افراد کی تلاش کے لیے ریسکیو آپریشن جاری ہے۔ پولیس حکام کا کہنا ہے گرنے والی دیوار تقریباً سو فٹ لمبی اور گیارہ فٹ اونچی تھی، پل کی تعمیر کے لیے موجود مزدوروں نے دیوار کی آڑ میں ٹینٹ لگا رکھا تھا۔
ریسکیو ذرائع کا کہنا ہے کہ امدادی ٹیموں نے ملبے تلے دبے 4 مزدوروں کو زندہ نکال لیا ہے۔ پولیس حکام کے مطابق تھانہ کہنہ کے علاقے محمدی ٹاؤن میں بھی دیوار گرنے کا ایک واقعہ پیش آیا ہے، جس میں 11 سال کی ایک لڑکی جاں بحق ہو گئی ہے۔
