لاہور: واپڈا کے ترجمان نے کہا ہے کہ گولن گول ہائیڈرو پاور پراجیکٹ سے بجلی کی پیداوار بڑھ گئی ہے، پراجیکٹ سے 108 میگا واٹ بجلی پیدا ہوئی۔

تفصیلات کے مطابق ترجمان واپڈا نے کہا ہے کہ گولن گول ہائیڈرو پاور پراجیکٹ سے بجلی کی پیداوار میں اضافہ ہو گیا ہے اور بجلی کے اس منصوبے سے ایک سو آٹھ میگا واٹ بجلی پیدا ہوئی ہے۔

واپڈا کا کہنا ہے کہ پاور پراجیکٹ کے 3 پیداواری یونٹس ہیں، اور ہر یونٹ 36 میگا واٹ کا ہے، گولن گول پراجیکٹ سے ہر سال 43 کروڑ 60 لاکھ یونٹ سستی بجلی پیدا ہوگی۔

یہ بھی پڑھیں:  مہمند ڈیم کی تعمیر68 ماہ میں مکمل ہوجائے گی، چیئرمین واپڈا

ترجمان نے کہا کہ گولن گول ہائیڈرو پاور پراجیکٹ سے سالانہ 3 ارب 70 کروڑ روپے کا فائدہ ہوگا۔

خیال رہے کہ اس منصوبے کا گزشتہ سال فروری میں افتتاح ہوا تھا، اس وقت کے وزیر اعظم نے کہا تھا کہ اس منصوبے کی تکمیل کے بعد چترال میں کبھی لوڈ شیڈنگ نہیں ہوگی۔

تاہم بجلی گھر کے افتتاح کے بعد 35 میگا واٹ بجلی پیدا ہونے کے باوجود علاقے میں مستقل پانچ گھنٹے کی لوڈ شیڈنگ جاری رہی، جب کہ پورے چترال میں بجلی کی طلب کل 17 میگا واٹ ہے۔