کراچی : میئر کراچی وسیم اختر نے کہا ہے کہ تجاوزات کے خلاف مہم میں ڈھائی ہزار سے زائد تاجر متاثر ہوئے جن میں سے لگ بھگ دو ہزار تاجروں کو متبادل جگہ فراہم کردی گئی ہے۔
تفصیلات کے مطابق بلدیہ عظمیٰ کراچی کے دفتر میں دکانداروں کو متبادل الاٹمنٹ سے متعلق قرعہ اندازی کی گئی، اس موقع پر میئر کراچی وسیم اختر نے قرعہ اندازی کرکے متبادل دکانوں کے الاٹمنٹ آرڈر تقسیم کیے۔
تقریب سے خطاب کرتے ہوئے میئر کراچی نے کہا کہ ٹھٹھہ بس اسٹاپ لی مارکیٹ میں متبادل جگہیں دی جارہی ہیں، عدالتی احکامات پر تجاوزات کے خلاف مہم میں 2552 تاجر متاثر ہوئے تھے، جن میں سے1993کو اپنا روزگار جاری رکھنے کیلئے متبادل جگہ فراہم کرچکے ہیں، جلد ہی باقی متاثرین کو بھی متبادل جگہ فراہم کردی جائے گی۔
میئر کراچی کا کہنا تھا کہ تاجروں کی جانب سے ملنے والے آج کے تحائف کے ایم سی اسٹیٹ ڈیپارٹ کے نام کرتا ہوں، عدالتی حکم پر نہ چاہتے ہوئے بھی عمل کرنا پڑا، تجاوزات کے خلاف آپریشن کا معائنہ نیم دلی سے کرتا تھا۔
انہوں نے کہا کہ تاجروں کی فلاح کے لئے کسی نے کے ایم سی کا ساتھ نہیں دیا، شہر میں کئی پلاٹ خالی ہیں، وزیراعلی ٰ ان پر ہاکر زون بنائیں۔
اپنے خطاب میں ان مزید کہنا تھا کہ ہم نے شہر سے سارے چائنہ کٹرز فارغ کردیے ہیں جو تھوڑے بہت رہ گئے ہیں ان کو بھی جلد فارغ کردیں گے، چائنہ کٹرز نے شادی ہالز بنائے تھے ان کو اب ہٹادیا گیا ہے۔
