واشنگٹن : امریکی دارلحکومت واشنگٹن میں امریکن ایئر لائنز کا مسافر طیارہ ہیلی کاپٹر سے ٹکرا کر تباہ ہوگیا، طیارے میں 60 مسافر سمیت عملے کے چار افراد سوار تھے۔
تفصیلات کے مطابق واشنگٹن کے قریب مسافر طیارہ آسمان میں فوجی ہیلی کاپٹر سے ٹکرا گیا اور دریا میں جاگرا۔
امریکی میڈیا نے بتایا کہ طیارےمیں 60 مسافر سمیت عملے کے چار افرادسوارتھے جبکہ ہیلی کاپٹر میں تین فوجی موجود تھے۔
حادثہ رونلڈریگن ایئرپورٹ کے قریب پیش آیا، جس کے بعد رونلڈ ریگن ایئرپورٹ کو پروازوں کیلئے عارضی طور پر بند کردیا گیا
ہے۔
امریکی فوج نے طیارے کی بلیک ہاک ہیلی کاپٹر سے ٹکرانے کی تصدیق کردی اور بتایا کہ مسافر طیارہ امریکن ایئر لائن کا تھا۔
امریکی حکام کا کہنا ہے لینڈنگ کے دوران طیارہ فوجی ہیلی کاپٹر سے ٹکرا یا اور دریا میں جاگرا ، حادثے کے بعد ریسکیو ٹیمیں جائے وقوع پر پہنچ گئیں ہیں اور امدادی کارروائیاں جاری ہیں تاہم سرد موسم کے باعث ریسکیو آپریشن میں دشواری کا سامنا ہے۔
ترجمان وائٹ ہاوس کا کہنا ہے صدرڈونلڈ ٹرمپ کوحادثےسے متعلق آگاہ کردیا گیا ہے، ٹرمپ کا کہنا ہے کہ طیارہ حادثے سے متعلق صورتحال کوغورسےدیکھ رہاہوں، طیارے میں سوار مسافروں کے اہلخانہ سے اظہار ہمدردی کرتاہوں، جائےوقوعہ پرپہنچنےوالےریسکیوٹیموں کی کارکردگی کوسراہتاہوں۔
