The news is by your side.

Advertisement

ایک اور انٹرنیشنل ٹیم پاکستان آنے کو تیار

لاہور: چیف ایگزیکٹو پی سی بی وسیم خان کا کہنا ہے کہ آئندہ برس جنوری میں جنوبی افریقہ کی ٹیم پاکستان کا دورہ کرے گی۔

اے آر وائی نیوز کی رپورٹ کے مطابق لاہور میں کلب کرکٹ ٹورنامنٹ کے افتتاح کے بعد میڈیا سے گفتگو کرتے ہوئے چیف ایگزیکٹو پی سی بی وسیم خان نے کہا کہ زمبابوے کا دورہ پاکستان اور پی ایس ایل کے بقیہ چار میچز کا ہونا خوش آئند ہے، جنوبی افریقہ کی ٹیم بھی جنوری میں پاکستان کا دورہ کرے گی۔

انہوں نے کہا کہ قومی ٹیم پانچ ٹی 20 اور اے ٹیم دو چار روزہ میچز کی سیریز کھیلنے کے لیے نیوزی لینڈ جائے گی۔

وسیم خان نے کہا کہ کلب کرکٹ ملک میں کھیل کے فروغ کے لیے انتہائی اہم ہے، کلب کرکٹ سے ہی کھلاڑی مرحلہ وار قومی ٹیم تک پہنچتے ہیں، پی سی بی آئندہ ماہ سے کرکٹ کلبز کی رجسٹریشن کا آغاز بھی کررہا ہے۔

چیف ایگزیکٹو پی سی بی نے بتایا کہ ہیڈ کوچ مصباح الحق اور محمد حفیظ سے آئندہ ہفتے ملاقات ہوگی جس میں ان سے وزیراعظم سے ملاقات کے حوالے سے وضاحت لی جائے گی۔

واضح رہے کہ اکتوبر نومبر میں زمبابوے کے ساتھ تین میچز پر مشتمل ون ڈے سیریز اور ٹی 20 میچز ملتان اور راولپنڈی اسٹیڈیمز میں کھیلے جائیں گے۔

ون ڈے میچز 30 اکتوبر، یکم اور 3 نومبر کو کھیلے جائیں گے، جس کے بعد 3 ٹی ٹوینٹی میچز 7، 8 اور 10 نومبر کو کھیلے جائیں گے۔

Comments

یہ بھی پڑھیں