کراچی : پی آئی اے کے پائلٹ نے دوران پرواز اسرائیل پر فائر کیے گئے ایرانی میزائلوں کی ویڈیو بنالی، بیلسٹک میزائل سعودی فضائی حدود سے گزرتے ہوئے اسرائیل کی جانب جارہے تھے۔
تفصیلات کے مطابق قومی ایئرلائن (پی آئی اے ) کے پائلٹ نے دوران پرواز اسرائیل پر فائر کیے گئے ایرانی میزائلوں کی فلم بندی کی، پائلٹ نے یہ ویڈیو سعودی فضائی حدود میں اپنے طیارے کے کاک پٹ سے بنائی۔
ائیرلائن ذرائع نے بتایا کہ گزشتہ شب جدہ سے پاکستان آنے والی قومی ایئرلائن کا طیارہ جس وقت سعودی فضائی حدود میں دممام سٹی پرسے گزر رہا تھا، عین اس وقت ایران سے فائرکیے گئے بیلسٹک میزائل سعودی فضائی حدود سے گزرتے ہوئے اسرائیل کی جانب جارہے تھے، اس دوران پائلٹ نے اپنے طیارے کے کاک پٹ سے ان میزائیلوں کی ویڈیو بنا لی۔
ذرائع کا کہنا تھا کہ اس مقام پر ایرانی سرحد بہت قریب ہے، ان بیلسٹک میزائیلوں سے پرواز کرتے طیاروں کوکوئی خطرہ نہیں ہوتا کیوں کہ یہ میزائل بہت بلندی پر اپنا راستہ بناتے ہیں۔
اس سے قبل ایسی تصاویر اور ویڈیوز سامنے آچکی ہیں جن میں ایران کے میزائل حملوں کے بعد اسرائیل کے مختلف حصوں میں بڑے پیمانے پر تباہی ہوئی ہے، جس میں کئی عمارتیں ملبے کا ڈھیر بن گئی ہیں تاہم ریسکیو ٹیموں نے ملبے سے متعدد افراد کو نکال لیا ہے۔
ٹائمز آف اسرائیل نے خوف اور افراتفری کے مناظر کی اطلاع دی ہے کیونکہ ایرانی میزائل ملک کے وسطی علاقوں پر گرے، جس سے کافی نقصان اور جانی نقصان ہوا۔
