قصور: بھارت کی جانب سے دریا راوی میں پانی چھوڑنے کے بعد دریائے ستلج میں پانی کی سطح بھی تیزی سے بلند ہونے لگی۔
اے آر وائی نیوز کے مطابق دریائے ستلج میں پانی کی سطح تیزی سے بلند ہونے لگی، دریائے ستلج میں گنڈا سنگھ کے مقام پر پانی کا اخراج 17360 کیوسک ریکارڈ کیا گیا۔
ضلعی انتظامیہ کا کہنا ہے کہ دریائے ستلج میں پانی کے اضافے سے فصلیں متاثر ہونےکا خدشہ ہے جس کے پیش نظر دریائے ستلج کے قریبی علاقوں کو الرٹ جاری کردیا۔
دوسری جانب دریائے راوی میں ماڑی پتن کے مقام پر پانی کی سطح میں مسلسل اضافہ ہورہا ہے، ضلعی انتظامیہ نے تمام اداروں کو ہائی الرٹ جاری کر دیا۔
ڈپٹی کمشنر کا بتانا ہے کہ دریائے راوی میں اس وقت 14225کیوسک پانی گزر رہا ہے، ماڑی پتن کے مقام سے 75 ہزار کیوسک پانی کا ریلاگزر سکتا ہے۔
واضح رہے کہ بھارت نے دریائے راوی میں ایک لاکھ 85 ہزار کیوسک پانی چھوڑ دیا ہے پی ڈی ایم اے نے دریا میں انتہائی اونچے درجے کے سیلاب کا الرٹ جاری کر دیا ہے۔
