نئے سال کے پہلے مہینے میں بہت سے افراد خود سے وزن کم کرنے کا وعدہ کرتے ہیں، اس کے لیے بہت سی ورزشیں اور ترکیبیں آزمائی جاتی ہیں، آج آپ کو وزن کم کرنے کے 7 طریقے بتائے جارہے ہیں۔
ماہر غذائیات سکینہ القاضی نے ایک سعودی ویب سائٹ سے بات کرتے ہوئے وزن کم کرنے کے 7 طریقے بتائے، ان کے مطابق ان طریقوں پر عمل کرنے سے 2 ماہ میں 7 کلو تک وزن کم ہونے کا امکان ہے۔
سکینہ القاضی کے مطابق وزن کم کرنے کے لیے کھانوں میں مصالحہ تیز کریں، مصالحے دار کھانوں سے جسم کو بہت سارے فوائد پہنچتے ہیں، کیونکہ ان میں کیپساسین ہوتی ہے۔ یہ ایک مادہ ہے جو بھوک کی شدت کو کم کرتا ہے۔
اس کے علاوہ مصالحہ دار کھانا کھانے سے جسم کے درجہ حرارت میں اضافہ ہوتا ہے، جس کے بعد جسم معمول کے درجہ حرارت پر واپس آتا ہے یوں اضافی کیلوریز جل جاتی ہیں۔
سپر مارکیٹ جاتے ہوئے کوشش کریں کہ ضرورت ہو تب ہی جائیں، اس بات پر توجہ مرکوز رکھیں کہ خریداری کے دوران آپ کی ٹوکری پھلوں اور سبزیوں سے بھر جائے۔
وزن کم کرنے کا آسان نسخہ یہ بھی ہے کہ اپنے کھانے سے نمک اور چینی کی مقدار کم کر دیں۔ نمک جسم میں مائع مادوں میں اضافہ کرتا ہے، جس سے آپ کو جسم بھاری بھاری محسوس ہوتا ہے۔
جہاں تک چینی کی بات ہے تو اس کے مضر اثرات سے ہر کوئی اچھی طرح واقف ہے۔ مشروبات اور دیگر اشیا میں اس کی مقدار کم رکھیں۔ صرف قدرتی اشیا میں موجود شوگر پر اکتفا کریں جیسے میٹھے پھل وغیرہ۔
کھانا کھاتے ہوئے دھیان رکھیں کہ آپ کو کسی ایسی چیز سے پرہیز کرنا چاہیئے جس سے پریشانی لاحق ہو، جیسے کھانا کھاتے ہوئے ٹی وی دیکھنا۔ اس کے علاوہ کھانے کے کمرے میں گہرے رنگ کی دیواروں سے بھی کھانے میں اضافہ ہوتا ہے۔
ہلکے رنگوں کا انتخاب بھوک کو کم کرنے میں بالواسطہ معاون ثابت ہوگا، ہلکے رنگ کی پلیٹوں کے استعمال سے بھی کھانے کی مقدار میں کمی آسکتی ہے۔
کھانے کے اوقات کی پابندی کریں، اگر کوئی شخص صبح 8 بجے ناشتہ کرنے کا عادی ہے اور کسی دن وہ نہ کر سکے تو وہ ناقابل برداشت بھوک محسوس کرے گا۔ اس کی وجہ یہ ہے کہ اس کا جسم اس مخصوص وقت میں بھوک کے ہارمونز چھوڑنے کاعادی ہوتا ہے۔ لہٰذا کھانے کے اوقات کی پابندی لازمی ہے۔
دن کے آخری کھانے کا وقت شام کے 8 بجے سے پہلے ہو، کیونکہ اس کے بعد جسم کو آرام کی ضرورت ہوتی ہے۔
مناسب نیند لیں، سائنسی تحقیق اچھی نیند کی اہمیت کی تصدیق کرتی ہے۔ خاص طور پر وزن کم کرنے کے عمل کے دوران ہارمونز کو ریگولیٹ کرنے اور ان کو کنٹرول کرنے میں نیند کا بڑا اہم کردار ہوتا ہے۔ بالغ افراد 7 سے 9 گھنٹے تک رات کی نیند ضرور لیں۔
ایک تحقیق سے یہ بھی معلوم ہوا کہ جو افراد نیند مکمل نہیں کرتے وہ اگلے روز زیادہ کھانا کھاتے ہیں، اس سے جسم میں چربی کی زیادہ مقدار چلی جاتی ہے۔
ماہر غذائیات کے مطابق کوئی بھی چیز کھاتے وقت ہچکچاہٹ مت دکھائیں اور نہ ہی اس میں موجود کیلوریز کے بارے میں سوچیں۔ اگر آپ اپنی پسند کا کھانا کھانے سے خود کو محروم کر دیں گے تو آپ وقت کے ساتھ ساتھ اسے لالچ میں بدل لیں گے۔ ہمیشہ یاد رکھیں کہ اعتدال کامیابی کی کلید ہے۔
