وزیر آباد: غیر قانونی طور پر ایران جانے والا شہری وقار حسین انسانی اسمگلرز کا شکار بن گیا۔
تفصیلات کے مطابق وزیر آباد کے علاقے درگئی والا کا رہائشی جواں سال وقار انسانی اسمگلرز کا ایک اور شکار ثابت ہوا، سنہرے مستقبل کے خواب آنکھوں میں سجائے ایران سے ترکی کے لیے عازم سفر نوجوان اغوا کاروں کا شکار بن کر موت کے ابدی سفر پر روانہ ہو گیا۔
وقار حسین 2 ماہ قبل بہتر مستقبل کے لیے انسانی اسمگلرز کی جانب سے دکھائے گئے سبز باغوں کے جھانسے میں آ کر ایران سے ترکی و یونان کے لیے عازم سفر ہوا تھا، خاندانی ذرائع کا کہنا ہے کہ اس سفر پر وقار کا سگا بھانجا حاشر اور بھتیجا ہاشم بھی اس کے ہمراہ تھے۔
ایران کے شہر چلدران میں انسانی اسمگلرز نے انھیں پکڑ کر سیف میں تینوں کو قید رکھا اور رہائی کے لیے 15 ہزار ڈالرز طلب کیے، تاہم اہل خانہ نے 12 ہزار ڈالرز بھجوائے۔
ذرائع کے مطابق مغوی ہاشم اور حاشر ایجنٹ کی قید سے بھاگ نکلنے میں تو کامیاب ہو کر وطن واپس پہنچ گئے تاہم وقار حسین تشدد سے قید میں جاں بحق ہو گیا، اور ایرانی پولیس نے متوفی وقار کی امانتاً تدفین کی، وقار حسین 4 بچیوں کا باپ تھا۔
خاندانی ذرائع کے مطابق وقار کے اہل خانہ نے ایرانی حکومت سے رابطہ کیا تو اس کی لاش ان کے حوالے کر دی گئی۔ جب کہ پولیس تھانہ علی پور چٹھہ نے متوفی وقار کے بھائی کی مدعیت میں انسانی اسمگلرز رانا عثمان، رانا وکیل اور رانا ضیغم ساکنان حافظ آباد پر مقدمہ درج کر لیا ہے۔
