قومی کرکٹ ٹیم کے فاسٹ بولر شاہین شاہ آفریدی نے مداحوں سے اپیل کی ہے کہ وہ اس مشکل وقت میں پاکستانی کرکٹ ٹیم کو سپورٹ کریں۔
آئی سی سی ٹی ٹوئنٹی ورلڈکپ 2024 میں پاکستان کی کارکردگی پر مداح کافی ناراض نظر آتے، ٹیم امریکا اور بھارت کے خلاف میچ ہارنے کے بعد ٹورنامنٹ سے اخراج کے دہانے پر پہنچ چکی ہے اور اگلے مرحلے میں پہنچنے کے لیے پھر سے اگر مگر کی صورتحال کا شکار ہے۔ا
شاہین آفریدی نے یوٹیوب چینل پر ایک انٹرویو کے دوران کہا کہ ہر کوئی اچھے وقت میں آپ کو سپورٹ کرتا ہے لیکن میرا ہمیشہ یہی کہنا ہے کہ فینز کو آپ کو برے وقت میں سپورٹ کرنا چاہیے۔
لیفٹ ہینڈ پیسر نے مداحوں سے درخواست کی کہ ہم آپ کی ٹیم ہیں کوئی گلی کی کرکٹ ٹیم نہیں، یا ہم کوئی ایسی ٹیم نہیں ہیں جس میں پلیئرز کو سفارش کی بنیاد پر منتخب کیا گیا ہے۔ اگر آپ اس وقت ٹیم کو سپورٹ نہیں کریں گے تو آپ بھی میڈیا کی طرح ہی ہونگے۔
انھوں نے یہ بھی انکشاف کیا کہ میں نے شاہد آفریدی سے کافی مدد لی ہے اور معین خان اکیڈمی میں اپنی بیٹنگ پر کافی کام کیا ہے۔
شاہین آفریدی کا کہنا تھا کہ میرا کردار یہ ہے کہ آخری کے اوورز میں باؤنڈریز لگاؤں اس لیے میں زیادہ تر اسی چیز کی پریکٹس کرتا ہوں۔
خیال رہے کہ پاکستان نے کینیڈا کے خلاف جیت حاصل کرتے ہوئے ٹورنامنٹ میں اپنی امیدیں برقرر رکھی ہیں، گرین شرٹس کا اگلا مقابلہ آئرلینڈ کے ساتھ شیڈول ہے۔
