ہائی پرفارمنس سینٹر کے ڈائریکٹر عاقب جاوید کا کہنا ہے کہ اسکلز ڈیولپمنٹ کیمپ میں بابر اور رضوان کو غلطیاں بہتر کرنے کی ہدایت کردی۔
اسکلز ڈیولپمنٹ کیمپ کے آخری دن قذافی اسٹیڈیم میں میڈیا سے گفتگو کرتے ہوئے عاقب جاوید نے اس بات پر زور دیا کہ اس کا بنیادی مقصد یہ یقینی بنانا تھا کہ کھلاڑی باقاعدہ سیزن سے باہر مصروف رہیں۔
انہوں نے واضح کیا کہ اگرچہ مختصر کیمپ میں تکنیکی خامیوں کو دور نہیں کیا جا سکتا تاہم کھلاڑیوں کو ان شعبوں کے بارے میں رہنمائی کی جا سکتی ہے جن میں بہتری کی ضرورت ہے۔
’ویسٹ انڈیز میں پاکستان جیت گیا تو بھول جائیں کہ بابر اور رضوان ورلڈ کپ کھیلیں گے‘
انہوں نے کہا، "آپ چھ یا سات دنوں میں غلطیوں کو ٹھیک نہیں کر سکتے لیکن آپ کھلاڑیوں کو یہ ضرور بتا سکتے ہیں کہ ان سے کیا توقع کی جاتی ہے۔ خیال یہ تھا کہ انہیں آف سیزن کے دوران بھی ایکشن میں رکھا جائے۔”
عاقب نے بابر اعظم اور محمد رضوان جیسے سینئر کھلاڑیوں کی شمولیت پر کہا کہ دونوں نے کیمپ میں شرکت کی اور بہتری کے شعبوں پر رائے لی۔
انہوں نے کہا کہ ہم نے بابر اور رضوان دونوں کے ساتھ کام کیا اور انہیں بتایا کہ کھیل کو کیسے بہتر بنایا جائے۔
عاقب جاوید نے مزید کہا کہ یہ پریکٹس نومبر تک جاری رہے گی تاکہ ہم ہر کھلاڑی کا بیک اپ تیار کرسکیں۔
