لاہور: پاکستان کرکٹ بورڈ (پی سی بی) کے چیئرمین رمیز راجا نے گزشتہ روز پاک افغان میچ کے بعد افغان شائقین کے رویے کا معاملہ آئی سی سی کے سامنے اٹھانے کا اعلان کردیا۔
چیئرمین پی سی بی رمیز راجا نے نیوز کانفرنس کرتے ہوئے کہا کہ آپ کرکٹ کے ساتھ پرتشدد رویے کی نشاندہی نہیں کرسکتے اس سے ماحول خراب ہوتا ہے جو کرکٹ میں برداشت نہیں کیا جاسکتا۔
انہوں نے کہا کہ یہ پہلی بار نہیں ہے کہ یہ واقعہ ہوا ہے جیت یا ہار کھیل کا حصہ ہے۔ جذبات کو قابو میں رکھنا چاہیے کیونکہ اگر آپ ایسا ماحول نہیں بنا سکتے تو آپ کرکٹ کھیلنے والے ملک کے طور پر آگے نہیں بڑھ سکتے۔.
PCB Chairman Ramiz Raja comments on the crowd trouble in last night’s match between Pakistan and Afghanistan.#AsiaCup2022 pic.twitter.com/CgUVJoMBkh
— Pakistan Cricket (@TheRealPCB) September 8, 2022
رمیز راجا کا کہنا تھا کہ ہم یقینی طور پر آئی سی سی کو لکھیں گے اور اپنے خدشات ظاہر کریں گے کیونکہ ہم اپنے مداحوں کے مقروض ہیں اور ان کے ساتھ کچھ بھی ہوسکتا تھا ہماری کرکٹ ٹیم بھی خطرے میں پڑ سکتی تھی۔
انہوں نے کہا کہ ہم اپنا احتجاج آئی سی سی کے ساتھ شیئر کریں گے اور پروٹوکول کے مطابق کارروائی کریں گے۔
واضح رہے کہ افغان ٹیم کی شکست کے بعد افغان شائقین کی اسٹینڈز کو نقصان پہنچانے اور پاکستانی شائقین پر حملہ کرنے کی ویڈیوز سوشل میڈیا پر وائرل ہو گئی تھیں۔
