کراچی: شہر قائد کا موسم آج بھی سرد اور خشک رہے گا اور شہر میں تیز ہوائیں چلیں گی۔
تفصیلات کے مطابق کراچی میں سردی کی شدت بڑھنے لگی ہے، رات گئے کم سے کم درجہ حرارت 8.8 ریکارڈ کیا گیا، محمکہ موسمیات کا کہنا ہے کہ شہر میں آج بھی موسم سرد اور خشک رہے گا۔
کراچی میں سرد ہوائیں چلنے کی وجہ سے درجہ حرارت سنگل ڈیجٹ پر آ گیا ہے، صبح شہر کا درجہ حرارت 9 ڈگری ریکارڈ کیا گیا، شہر میں ہوا 10 کلومیٹر فی گھنٹے کی رفتار سے چل رہی ہے، آج رات سے سردی کی شدت میں مزید اضافے کی توقع ہے۔
چیف میٹرولوجسٹ سردار سرفراز کے مطابق کراچی میں کل سے ہواؤں کی رفتارکم ہونے کی پیشگوئی ہے، جس کی وجہ سے شہر میں درجہ حرارت مزید گر سکتا ہے۔
انھوں نے بتایا کہ جنوری کے پہلے ہفتے میں کوئٹہ کی سرد ہوائیں شہر میں داخل ہوں گی، جس کی وجہ سے 4 سے 5 جنوری کے بعد سردی کی شدت میں مزید اضافہ ہو جائے گا۔
سردار سرفراز کے مطابق رواں ماہ دسمبر کے آخری ہفتے رات کا درجہ حرارت 8 سے 11 ڈگری سینٹی گریڈ تک جا سکتا ہے، اور دن کا درجہ حرارت 23 سے 25 ڈگری سینٹی گریڈ کے درمیان رہنے کا امکان ہے۔
ملک کے بیش تر علاقوں میں موسم سرد، پہاڑی علاقوں میں شدید سرد رہے گا، مری، گلیات اور گرد و نواح میں ہلکی برف باری ہوگی، جب کہ کشمیر میں موسم شدید سرد اور چند مقامات پر ہلکی بارش اور ہلکی برف باری کا امکان ہے۔
