کراچی: محکمہ موسمیات کا کہنا ہے کہ آج کراچی میں زیادہ سے زیادہ درجہ حرارت 37 ڈگری تک جانے کا امکان ہے۔

تفصیلات کے مطابق کراچی میں آج بھی موسم گرم اور مرطوب رہے گا ، شہرکا زیادہ سے زیادہ درجہ حرارت 37 ڈگری تک جانے کا امکان ہے۔

محکمہ موسمیات کے مطابق کراچی کا موجودہ درجہ حرارت 32 ڈگری سینٹی گریڈ، ہوا میں نمی کا تناسب62 فیصد ہے، جنوب مشرق سے ہوا 10 ناٹیکل مائیل کی رفتارسے چل رہی ہے۔

محکمہ موسمیات کا کہنا ہے کہ 27جون کے بعد سے شہرکا موسم بہترہونے کا امکان ہے۔

یاد رہے کہ گزشتہ روز ڈی جی خان، ملتان، بہاولپور، ساہیوال، سرگودھا، فیصل آباد، لاہور، گوجرانوالہ، راولپنڈی، ڈی آئی خان، مالاکنڈ، ہزارہ، ژوب، سبی ، اسلام آباد، کشمیر اور گلگت بلتستان میں چند مقامات پر تیزگرد آلود ہواؤں، آندھی اور گرج چمک کے ساتھ بارش ہوئی۔

محکمہ موسمیات کے مطابق سب سے زیادہ بارش کوٹ ادو 34، ملتان، 24، لاہور 18، بہاولپور 21، اسلام آباد 10، مظفرآباد 27، گلگت بلتستان 7 ملی میٹر بارش ریکارڈ کی گئی۔