صحت اور تندرستی کا اصل راز ہری سبزیوں میں پوشیدہ ہے، ویسے تو تمام سبزیاں ہی مفید ہیں لیکن غذائی ماہرین ہرے پتوں والی سبزیوں کی غذائیت پر زیادہ زور دیتے ہیں۔
ہرے پتوں والی سبزیوں میں کرم کلا،پالک، سلاد پتہ، دھنیا، بند گوبھی، ہرے پتوں والے چقندر، اور دیگر سبزیاں شامل ہیں۔ ان میں موجود حیاتین، کلوروفل نمکیات اور سیلولوز، انسان کو بہترین توانائی فراہم کرتے ہیں۔
اے آر وائی نیوز کے پروگرام باخبر سویرا میں ماہر غذائیت پروفیسر زوبالا یاسر نے ان سبزیوں کی افادیت کو بیان کرتے ہوئے انہیں زیادہ سے زیادہ استعمال کرنے کا مشورہ دیا۔
انہوں نے بتایا کہ سب سے اہم مسئلہ یہ ہے کہ ان سبزیوں کو پکایا کیسے جائے؟ اگر سبزیوں کو زیادہ بھون لیا جائے تو اس میں سے اصل پروٹین کافی حد تک کم ہوجاتے ہیں اور صرف فائبر بچتا ہے۔
ان کا کہنا تھا کہ آج کل لوگ ہر سبزی میں گوشت شامل کرکے پکاتے ہیں جو مناسب نہیں کیونکہ ان میں شامل پروٹینز اور وٹامنز کو خون میں شامل ہونے کیلیے مشکلات ہوتی ہیں۔
پروفیسر زوبالا یاسر نے بتایا کہ آلو شوگر کے مریضوں کے ہاضمے کیلیے پریشانی کا باعث بنتے ہیں اس کیلئے بہترین طریقہ یہ ہے کہ آلوؤں کو پکانے کے بعد انہیں بالکل ٹھنڈا کریں اور پھر ہلکا سا گرم کرکے کھائیں تو اس میں نشاستہ کی مقدار کم ہوجائے گی۔
ان کا کہنا تھا کہ تمام سبزیوں کو ہلکی آنچ پر بھاپ میں پکائیں اور گھی یا تیل کا استعمال بھی کم کریں اس سے سبزیوں کی غذائیت پوری ملے گی اور صحت پر بھی بہت اچھا اثر پڑے گا۔
