روز مرہ زندگی کا تھکا دینے والا معمول بعض اوقات ہمیں بیمار کردیتا ہے، اور ہمارے کاموں میں خلل نہ پڑے یہ سوچ کر ہم کوئی دوا کھا کر جلد سے جلد اس بیماری سے چھٹکارا پانا چاہتے ہیں۔
تاہم ماہرین نے کہا ہے کہ بیمار محسوس ہونے کی صورت میں اگر ایک کام کرلیا جائے تو بیماری بغیر کسی دوا کے بھی ٹھیک ہوسکتی ہے۔
امریکی ماہرین کا کہنا ہے کہ بیماری محسوس ہونے کی صورت میں آپ کو دوا لینے کے بجائے بستر پر لیٹ کر آرام کرنا چاہیئے۔
دا جرنل آف ایکس پیری مینٹل میڈیسن میں چھپنے والی تحقیق کے مطابق اس کا تجربہ 10، 10 افراد کے 2 گروہوں پر کیا گیا۔ ایک گروہ کے افراد کو نصف رات تک جاگنے کو کہا گیا جبکہ دوسرے گروہ کے افراد نے معمول کے مطابق اپنی نیند پوری کی۔
بعد ازاں ماہرین نے ان کے قوت مدافعت کے خلیات (ٹی سیلز) کا تجزیہ کیا، ماہرین نے دیکھا کہ وہ افراد جنہوں نے اپنے نیند پوری کی ان کے ٹی سیلز نے بہتر کارکردگی کا مظاہرہ کیا جس کے نتیجے میں ان میں بیماری سے لڑنے کی صلاحیت میں اضافہ ہوا۔
اس کے برعکس وہ افراد جن کی نیند پوری نہیں ہوئی ان کے ٹی سیلز اتنے فعال نہیں تھے کہ بیماری کے جراثیم کا مقابلہ کرسکیں نتیجتاً ان کی بیماری میں شدت پیدا ہونے کا امکان بڑھ گیا۔
ماہرین کی تجویز ہے کہ مصروفیات سے ہونے والی بیماری جیسے تھکن، معمولی جسمانی درد یا ہلکا بخار محسوس ہونے کی صورت میں دوا لینے سے قبل کچھ وقت آرام کرنا چاہیئے، اس کے بعد بھی اگر بیماری برقرار ہو تو ڈاکٹر سے رجوع کرنا چاہیئے۔
