آج کل کی مصروف زندگی میں اکثر لوگ اپنا ناشتہ چھوڑ دیتے ہیں تاہم یہ صحت کے لیے نہایت خطرناک ہوسکتا ہے۔
ماہر غذائیات ڈاکٹر عائشہ عباس نے اے آر وائی نیوز کے مارننگ شو باخبر سویرا میں گفتگو کرتے ہوئے کہا کہ اب تک بے شمار ریسرچز ہوچکی ہیں جن میں ثابت ہوچکا ہے کہ ناشتہ صحت کے لیے نہایت ضروری ہے۔
انہوں نے کہا کہ ناشتہ کرنے سے دماغ چاق و چوبند اور فعال رہتا ہے، کام کرنے والوں اور اسکول جانے والے بچوں کی کارکردگی میں بہتری آتی ہے، بھوک کم لگتی ہے جبکہ وزن میں بھی کمی ہوتی ہے۔
ڈاکٹر عائشہ کا کہنا تھا کہ ناشتے میں پروٹین اور کاربو ہائیڈریٹس کا امتزاج ہونا چاہیئے، جیسے کہ انڈا، گندم (روٹی یا پراٹھا)، دلیہ اور دہی وغیرہ ہونے چاہئیں۔ جوسز کی جگہ پھل کھانے چاہئیں یا پھر ملک شیکس لیے جائیں۔
انہوں نے کہا کہ ناشتے میں پراٹھا کھانے میں کوئی مضائقہ نہیں لیکن اس میں تیل کی مقدار بہت زیادہ نہ ہو، اور اس میں اضافی کیلوریز شامل نہ کی جائیں جیسے آلو یا قیمے کا پراٹھا بنا کر اسے ہاضمے پر بوجھ بنا لیا جاتا ہے۔
انہوں نے کہا کہ ہفتے کے 6 دن متوازن غذائیت سے بھرپور ناشتہ کیا جائے اور ساتویں دن بدپرہیزی کی جاسکتی ہے جیسے کہ فیملی کے ساتھ نہاری، یا حلوہ پوری کا ناشتہ۔
