اسلام آباد : پاک بھارت جنگ بندی میں واٹس ایپ کا اہم کردار سامنے آیا ، پس پردہ سفارت کاری میں واٹس ایپ کالز اور پیغامات کا سلسلہ دن بھر جاری رہا، جس کے بعد جنگ بندی پر اتفاق ہوا۔
تفصیلات کے مطابق پاکستان اور بھارت کے درمیان کشیدگی کم کروانے اورجنگ بندی میں جہاں کئی عالمی طاقتیں ، دوست ممالک اور اہم شخصیات سرگرم رہیں، وہیں واٹس ایپ نےبھی غیرمعمولی کردار ادا کیا۔
نائب وزیراعظم اسحاق ڈار نے بتایا کہ پس پردہ سفارت کاری میں واٹس ایپ کالزاور پیغامات کا سلسلہ دن بھر جاری رہا، جس کے بعد جنگ بندی پر اتفاق ہوا۔
یہ جدید "واٹس ایپ ڈپلومیسی” آج کی دنیا میں تیزی سے روایتی سفارت کاری کا متبادل بنتی جا رہی ہے تاہم ماہرین اس کی سیکیورٹی پر تحفظات کا اظہار کرتے ہیں۔
اگرچہ واٹس ایپ’اینڈ ٹواینڈ انکرپشن‘کی سہولت فراہم کرتا ہے، پھر بھی یہ صارف کی معلومات جمع کرتا ہے، جیسےکہ ڈیوائس کی معلومات، آئی پی ایڈریس، پروفائل نام، تصویر اور استعمال کی تفصیلات، جنہیں یہ اپنی پیرنٹ کمپنی میٹا کی دیگرسروسز جیسے فیس بک کے ساتھ شیئر کرتا ہے۔
