واٹس ایپ کی جانب سے ای میل ایڈریس سے متعلق ایک نئے سیکیورٹی فیچر پر کام جاری ہے۔
تفصیلات کے مطابق میٹا کی ملکیت واٹس ایپ نے حال ہی میں کئی نئے فیچرز متعارف کرائے ہیں، اب سیکیورٹی کو لے کر ایک اور فیچر متعارف ہونے جا رہا ہے۔
واٹس ایپ بیٹا انفو کے مطابق کمپنی اب بہتر سیکیورٹی کے لیے ای میل کے حوالے سے سیکیورٹی سخت کرنا چاہتی ہے، اس سلسلے میں واٹس ایپ کے صارفین کے ای میل ایڈریس سے منسلک سیکیورٹی فیچر متعارف کرایا جائے گا، جس سے سیکیورٹی میں مزید اضافہ ہو جائے گا۔
واٹس ایپ کا کہنا ہے کہ یہ فیچر اختیاری ہوگا اور یہ موجودہ ٹو اسٹیپ ویریفکیشن پروسس سے الگ ہوگا، اس میں بھی ای میل ایڈریس استعمال ہوتے ہیں۔
اس سال کے شروع میں واٹس ایپ نے مختلف سیکیورٹی فیچرز متعارف کرائے ہیں، جیسا کہ مختلف ڈیوائسز پر اکاؤنٹس کی غیر مجاز منتقلی سے تحفظ اور خودکار کوڈز کے ذریعے سیکیورٹی کوڈ کی توثیق کو آسان بنانا، تاہم یہ نیا فیچر موجودہ پروسس سے کس طرح مختلف ہوگا، اس سلسلے میں تفصیلات سامنے نہیں آئی ہیں۔
تاہم یہ کہا جا رہا ہے کہ یہ فیچر مخصوص حالات میں صارف کے اکاؤنٹ کے تحفظ اور تصدیق کے لیے ایک امید افزا ٹول ثابت ہوگا، ای میل پر مبنی یہ سیکیورٹی فیچر ابھی تیاری کے مرحلے میں ہے اور اسے مستقبل میں واٹس ایپ بیٹا اپ ڈیٹ میں لانچ کیا جائے گا۔
